KUCHING: Opis Menteri Pemansang Orang Indu, Ruang Bilik enggau Komuniti (KPWKM) ti betuaika menteri Dato Sri Rohani Abdul Karim ngatur sebengkah pengerembaika penerang pengawa opis menteri nya nengah kereban ti dikerindu baka kemaya hari tu iya nya nengah bloggers, Facebook enggau media rama bukai.
Rohani madah pengawa ngerembaika servis ti bisi diatur opis menteri nya deka negap sereta ngemanahka agi servis ke bisi disedia opis menteri nya.
Ba atur pengawa ‘Meet My Netsterz’ nya kemari, bisi 100 iku raban ke begulai enggau KPWKM iya nya raban media, bloggers sereta media rama bukai di Wisma Wanita, Jalai Sultan Tengah ditu, ensana.
Entara tuju ngaga program nya, ngambika bisi dikena nerangka sekeda pekara ke bekaul enggau opis menteri nya sereta mendingka timbal sereta penemu ke manah kena ngemanahka agi pengawa ejensi baruh opis menteri nya.
Dalam program ‘Mynetzterz’ dua jam lebih nya, Rohani empu meri penerang pasal tiap pengawa ke digaga ejensi baruh opis menteri nya nyengkaum sekeda bantu ti bisi disediaka ngagai mensia mayuh.
“Pemerat ke patut ditemu mensia mayuh, iya nya opis menteri tu megai tanggungpengawa ke berat ke mensia ayuh, laban iya bekaul enggau pengelantang pendiau kitai.
“Pemerat ku aku nya, orang ke diau ngelingi kitai, ari nembiak mit, orang tuai, indu, indai tunggal, orang ke nyelai pendiau, orang ke kena tasah sereta pengawa bukai KPWKM bukai, patut dikerembaika ngagai mensia mayuh,” ku iya.