KUCHING: Urung 7,174 iku sida ke bempu tanah skim pengentap baru sereta sida ke nangkir kampung deka nerima bayar pula baru premium tanah ti dikurangka dalam pemayuh urung RM43 juta.
Kaban Kunsil Nengeri (ADUN) Pending, Violet Yong minta orang asal ke bempu lut endur diau di pengentap baru sereta sida ke nangkir kampung, kelimpah ari Demak Fasa 3, 4 enggau 6 ke lalu bedau minta, tau minta nengah Opis Tanah enggau Survei.
Perintah nengeri udah mutuska deka ngurangka premium pala tanah ke lut endur diau di pengentap baru enggau sitak skim nangkir kampung datai ngagai 50 peratus tauka dalam RMRM2,500 ari penyampau RM5,000, berengkah ari 6 Mei, 2018.
“Tu berita ke manah, lalu aku pan gaga ati laban pekara ke dibantaika aku tu matak ati perintah nengeri, lalu sida iya pan udah nimbal lalu besetuju mayar pulai baru premium tanah tu,” ku iya madah ba aum pengarang berita di Palan Pengarang Berita, ba hari ke penudi iya Aum Kunsil Nengeri di Komplek Kunsil Nengeri (DUN) ditu, kemari.
“Enti nitih pukul rata, sida ke bempu tanah sebedau tu, deka nerima entara RM5,000 ngagai RM11,000. Nya siti penyampau ke mayuh ba sida iya,” ku iya.
Yong mega madah munyi tu lebuh nimbal Sapit Kepala Menteri ti mega nyadi Menteri Pengawa Industri enggau Pemansang Orang Dagang, Datuk Amar Awang Tengah Ali Hasan, lebuh mantai Jaku Gulung iya kemari, madahka Perintah menua udah besetuju deka mayar pulai baru premium tanah ngagai sida ke bempu tanah tu.
Iya nesau sida ke deka minta tu bayar lebih dipulaika baru tu enda tau enda ngemutarka pekara tu, pengabis laun pan, manggai 31 Oktober, lalu semina ungkup lut ke endar/betul deka dibayar pulai baru ulih perintah.
“Sida ke bempu tanah nyengkaum sida ke diau di pengentap baru enggau skim tangkir kampung di BDC, Sungai Apong enggau Desa Wira, ke udah minta pala tanah ngena rega ke lama, ulih minta bayar pulai baru tu,” ku iya.
Bekait enggau penerang ke silik agi, Yong madah penyilik penerang deka dipadah ulih Opis Tanah enggau Survei, laban sida iya bedau nyendiaka surat ke patut nyengkaum lis pemerat ke patut digaga.
“Reti nya, semina ungkup lut asal ke udah diberi tanah ulih perintah ulih nerima bayar nya. Enti sema tanah nya udah dijual ngagai orang bukai, enda ulih nerima bayar nya,” ku iya.