MIRI: ‘Anugerah Perkhidmatan Cemerlang’ (APC) diatur ninting taun iya nya siti ari pengawa ngenang pemanah pengawa enggau pengeransing sida ti gawa perintah ti udah ngayanka kualiti kereja ti nyulut.
Menteri Muda Orang Indu, Ruang Bilik enggau Pemansang Anak Mit Rosey Yunus madahka tu insentif diberi dikena meransang sida ti gawa perintah seruran gawa memanah ngambika ulih nyapai tagit ti udah ditetap.
“Meri pengaga ati ngagai semua penerima lalu aku ngarapka sida ti mujur deka seruran gawa bebendar gawaka menua sida,” ku Rosey rambau Majlis Anugerah Perkhidmatan Cemerlang Pejabat Pendidikan Daerah Subis 2017 diatur di Hotel Grand Palace, Miri kemari.
Sama bisi datai Pemesai Pelajar Pelilih Subis, Abdul Azid Ismail enggau Penulung Pemesai Pelajar Pelilih Subis, Irwan Tambi.
Nitih ku Rosey, ba renggat Opis Menteri Pelajar, iya ngarapka anugerah nya deka nyadi siti peransang ngagai bala kaban Opis Menteri Pelajar ke bukai, terus bebendar gawa nyapai juluk nempa Opis Menteri Pelajar nyadi Raban Nyediaka Pelajar Kelas Dunya.
Tandu iya, anugerah tu nyadi pun singkang ngagai Opis Menteri Pelajar kitai seruran nyapai penyulut ngambika tampak agi dipeda ari pemujur dijapao bala kaban gawa perindah dalam menua mansang.
Taja pia, ku Rosey, pekara beguna amat, sida ti udah dipilih nyadi penerima anugerah tu patut nyadi chunto ngagai orang bukai, terus gawa memanang nentuka tagit ulih dijapai.
Ku iya, penyulut tauka pemujur ukai muntang deka dijapai enti nadai pengepuh enggau pengeran gawa.
Iya pechaya semua orang seruran deka nyapai penyulut sereta deka dikelala kelebih agi dalam kereja, tang ukai semua kitai deka napi pemar nuju pemujur.
Nya alai, nentuka ulih napi pemar enggau penekul nya, Rosey ke mega Kaban Kunsil Nengeri (ADUN) Bekenu madah kitai patut ngetanka prinsip kualiti atur pengawa, atur pengawa ti lurus, sereta nitihka jalai pengarap sida.
“Enti nadai penetap enggau nagang diri, kitai deka muntang ngereja pengawa enda patut baka salah pengawa enggau salah kereja,” ku iya.
Tapa pia, iya nyemetak madah ke alai enda patut ngaga kereja ti dikearap enggau seruran minta balas tauka kelala aja.
Kitai meseti bisi pengelurus ngereja pengawa nyadika pelasar terus gawaka bansa, jalai pengarap enggau menua sereta lurus ati deka mai pemaik enggau pemanah ngagai Tuhan, ku iya nambah.
Ku iya, opis menteri endang seruran diperati ba sukut kualiti ngenataika servis ti diberi laban bala pelanggan dekaka asil tauka asil ulih diayan lalu nangkup peminta enggau peneka sida.
Ku iya, pekara tu begunaka peminta ngeluarka asil ti efektif agi, jampat sereta betul. Tambah mega, peragam bala pelanggan ngagai kualiti servis majak nambah, kelebih agi mutarka penanggul enggau nangkup peminta sida.
Nya alai, iya ngasaika udah umbas endur bala kaban Opis Menteri Pelajar ba semua renggat gawa bebagi gintir, ngambika servis ti disedia ngembuan asil lalu tetangkupka semua peminta pelanggan enggau raban bisi pemerat, enggau nadai ngelanggar polisi pemun enggau prinsip servis, ku iya.
“Opis Menteri Pelajar Malaysia nyadi pemun dalam pemansang modal mensia. Tagit nempa Malaysia nyadi menua mansang bepenatai pemisi bepanggai ba pengulih raban ba Opis Menteri Pelajar bejalaika pangku pengawa enggau pengandal sida,” ku iya nandu.
Kelimpah ari nya, kualiti servis sebengkah gempung nyadi pekara besai nentuka penyulut gempung nya, ke alai nyengkaum tim ngatur pengawa tetinggi ngagai staf ti nyaup gawa, ku iya nambah.
Ba lansa bukai ku iya, pengiruh gawa nempa bala komuniti nyadi orang ti ulih ngatika diri. Taja pia, iya ngasaoka enti sida ulih ngaul diri dalam aktiviti lumba enggau nyereta kelab tauka serakup, tentu ulih nempa gaya idup bepengerai agi, nambahka pengandal dalam diri, sereta mega semangat rama ti komprehensif ulih mai basa ngagai kitai.
“Aku andal amat bala penerima anugerah sehari tu, ti nyulut ba pangku pengawa sida, mega chakah dalam aktiviti komuniti tauka aktiviti bukai, ngelui ari pangku pengawa bukai,” ku iya.