Penegap penyerakup, kerejasama peranak menua ba sesebengkah genturung pendiau dikemeran kenyau ari menya
KUCHING: Penyerakup sereta kaul peranak menua ari macham pupu raban bansa enggau jalai pengarap di Genturung Pendiau Siol Kandis ditu nerima puji sereta patut ke teladan genturung pendiau bukai.
Apin lama ke udah maya pengerami Mantar Gawai Dayak 2014 di Genturung Pendiau Siol Kandis, Sekretari Politik Kepala Menteri Sharifah Hasidah Sayeed Aman Ghazali madah, penyerakup enggau pemanah kaul nya patut dikemeran sereta dikemeratka belama.
Tu ngayanka konsep 1Malaysia di Sarawak endang amat dikemeratka semua pupu raban bansa.
“Kitai di Sarawak nadai isu (bekaul enggau bansa tauka jalai pengarap), laban kitai udah lama ngelala pangan diri sereta bisi penyerakup.
“Genturung Pendiau Siol Kandis chunto ti pemadu manah, dalam sebuah genturung pendiau udah segulai sejalai baka diri menyadi taja pan diuan mayuh pupu raban bansa. Ngarapka semua pemanah tu dikemeran enggau dikemeratka belama,” ku iya.
Iya ti mega Kaban Kunsil Nengeri (ADUN) Samariang ti nyadi pengabang dipebasa pengerami Mantar Gawai Dayak 2014 genturung pendiau nya apin lama ke udah.
Nandu baru iya ngarapka rayat terus nyukung perintah ke diatu ngambika penyerakup, pengelantang enggau pemaik deka meruan belama.
“Kitai di nengeri tu nadai penanggul datai ke gereja, masjid tauka surau, taja pan nuan nya tadi ukai megai jalai pengarap nya.
“Nya alai pengelantang enggau pemaik ti baka tu patut dikemeran sereta dikenegap belama nengah chara meri sukung sereta kerejasama ngagai perintah ti megai menua diatu,” ku iya.