KUCHING: Rang Undang-undang Palan Biodiversiti Sarawak (Pindaan) Bill, 2014 iya nya seksyen 2, 6, 15A, 22 & 31 enggau seksyen 35 udah dikemendarka Kunsil Nengeri (DUN), pengudah ketiga kali dibacha.
Ubah Rang Undang-undang nya dibantaika Menteri Pengatur Pengeraja Asal & Rampa Menua, Datuk Amar Awang Tengah Ali Hasan.
“Tuju ngubah undang-undang nya dikena nyaga enggau ngintu pengeraja asal biodiversiti sereta ngemansangka iya nengah R&D ngambika ukai semina nguntungka nengeri aja tang ti pemadu beguna meri pangka ti manah ngagai raban bansa.
“Palan Biodiversiti Sarawak (SBC) ditumbuh dikena bejalaika pengawa pemansik enggau pemansang biodiversiti Sarawak ngambika ulih dikomersilka.
“Taja pia, penemu asal mega amat beguna dikena nentuka tuju nya lalu kitai ngena manah pengeraja asal ti dikembuan sereta dikemeran dalam farmaseutikal enggau terapeutik” ku iya.
Awang Tengah ti mega nyadi Menteri Pemansang Industri mansutka pekara nya lebuh ti nyimpul Rang Undang-undang Palan Biodiversiti Sarawak (Pindaan) Bill, 2014 maya baum Kunsil Nengeri kemari.
Bejaku baru iya madahka berengkah ari taun 2001 SBC udah ngaga dokumen pasal penemu asal ti mungkur 13 komuniti serata Sarawak.
“SBC udah ngaga dokument pasal 4,815 utai tumbuh ti mayuh guna nyangkaum ulih dikena dalam perubat, pemakai enggau pengerai, ti deka terus dipejalaika.
“SBC udah ngena pom PIC nengah program Dokumentasi Pengetahuan Tradisional,” ku iya seraya madahka tuju Rang Undang-undang tu ngambika lebih formal enggau ngenegapka agi.
Nambahka nya iya Rang Undang-undang nya mega dikena nyaga enggau ngintu pengeraja asal berindik ari pengawa ngaga tekat ai, ngambi batang, kebun bedandang besai enggau pemansang meri pangka ngagai biodiversiti.
Nitihku iya ti mega nyadi Menteri Perengka Guna Mensia Mayuh madahka pekara nya diputarka nengah polisi ngena tanah keudah bisi ngambika senipak enggau guna pemansang, penumbuh ekonomi enggau rampa menua.
“Nengah polisi tu, kitai ngungkupka sejuta hektar (8 peratus) ‘Totally Protected Area’(TPA) ba taun 2020, enam juta hektar (48 peratus) ‘Permanent Forest Estate’ enggau empat juta hektar (32 peratus) diungkup kena bekebun bumai,” ku iya.