BESAMPI: Catherine nerima kangau ari kaban belayan iya.
SIBU: Bangat ngenyinuka ati nuntung kaban ruang bilik Kapten pramugara bilun Malaysia Airlines (MAS) MH370, Andrew Nari, di rumah panjai iya di Sungai Aup lebuh semua piak agi nganti berita ke pengabis baru bekaul enggau pengelenyau bilun nya.
Indai Andrew, Tuai Rumah Catherine Tamoh madah, sida sebilik agi nganti sebarang berita bekaul enggau Andrew sereta nasit ke nuntung bilun nya enggau ati ti sabar.
“Kami semua agi nganti berita sereta besampi ngambika nadai pekara ke enda manah nyadi ba iya (Andrew) sereta mega bilun nya,” ku iya maya dikerandau pemberita, lemai kemari.
Bilun MH370 ke dalam penerebai ari Padang Bilun Antarabansa Kuala Lumpur (KLIA) ke Beijing, China teputus arus penyambung urung pukul 2.40 pagi kemari.
Penerebai MH370 nya mai 227 penumpang nyengkaum dua iku anak mit enggau 12 anak bilun. Bilun Boeing 777 tu bekejang ari Kuala Lumpur pukul 12.41 pagi Hari Enam lalu dipelabaka sangkai ba Beijing pukul 6.30 pagi hari ke sama.
Ku Catherine, iya ngarapka semua penumpang bilun nyengkaum anak iya selamat sereta ulih betemu enggau bala kaban belayan tauka sida sebilik.
Andrew, 49, anak tuai ari empat iku diri menyadi udah gawa enggau MAS nyadi pramugara sekumbang taun 1989. Iya udah bebini sereta bisi dua iku anak ke beumur 18 taun enggau 14 taun.
Catherine mega madah, anak iya nya sebedau tu diau ba Puchong, Kuala Lumpur begulai enggau bala iya sebilik.
“Taja pan diau ba Puchong, iya enggau sida sebilik enda kala enda pulai ke rumah panjai maya nyambut pengerami Gawai Dayak,” ku iya.
Kelimpah ari nya tandu Catherine, iya bisi bejaku enggau Andrew nengah telefon minggu nyin tadi.
“Kami suah berandau nengah telefon betanyaka berita diri.
“Enti aku enda betelefon ngagai iya, iya mega betelefon ngagai aku nanyaka berita kelebih agi bekaul enggau pengerai aku,” ku iya.