KANOWIT: Borneo Evangelical Mission (BEM) Pasar Betong udah ngatur program ngelawa ke Rumah Maling, Sungai Maong, Jalai Kanowit-Durin kemari.
Bisi 20 iku raban ari gerija BEM (SIB) datai ke rumah panajai nya ti betuaika prinsipal gerija Deacon Edwin Wee ti nyadi ketuai raban nya.
Penatai raban tu udah disambut manah Tuai Rumah Maling Nyapang begulai enggau peranak rumah panjai nya.
Raban gerija tu udah ngatur dua program iya nya besembiangka setaun indai tuai rumah tu ti udah midang lalu bejalaika aktiviti jalai pengarap.
Mayuh macham program udah ditusun iya nya sembiang pengelalu ari Pastor Pressila Conielia, jaku pengelalu ari Tr Maling, jaku lalau ari Deacon Edwin Wee, beserumpu makai begulai enggau peranak rumah panjai.
Sama bisi diatur iya nya program puji enggau nyembah ari Pastor Saloma Sigar lalu macha Kitab Injil ari Pastor Paul APeng, program ngajat nembiak mit ari Rumah Maling enggau pengari BEM (SIB) Pasar Betong Deacon Rumi Jenau, pengajar sekula minggu, sampi meri berekat, pengawa nyembah ari bala indai BEM (SIB) Pasar Betong.
Pengujung program tu iya nya pengawa nyuaka tepa pengingat ngagai Pastor Paul Apeng ari Tr Maling ngarika rumah panjai iya sereta Henry Jugah enggau bini mega nyuaka tepa ngagai Partos Paul Apeng, Pastor Saloma Sigar, Pastor Erickson Tabed enggau Deacon Naja Saju, Ketuai Pelayanan Wanita BEM (SIB) Pasar Betong.
Sama bisi datai iya nya Ketuai Gerija Ije Jackson, penulung Ketuai Gerija Deacon Bundan Umong enggau Penulung Tukang Wang gerija Deacon Edward Rangga.
Nitih ku Henry, program tu udah lama dilangkar iya enggau peranak rumah panjai sereta mega raban gerija, tang enggai enda ditangguh laban ti betapi enggau pandemik COVID-19.
"Chukup beterima kasih laban sehari tu (kemari) program nya diatur enggau manah," ku iya meri penenrang nengah aplikasyen WhatsApp.