KUCHING: Rayat Sarawak dilalau anang ilap enggau rampit COVID-19 taja pan Sarawak ngerikodka penyampau tau dirampit (RO) ti pemadu mimit di menua tu.
Sapit Kepala Menteri Dato Sri Dr Sim Kui Hian madah,negeri tu mega ngerikodka penyampau kes kematian ti pemadu mimit di serata menua (kelimpah ari Labuan enggau Putrajaya) berindik ari bantu enggau tanggungpengawa rayat Sarawak.
"Kitai (Sarawak) entara ke pemadu mimit RO COVID-19 di menua tu.
“Tang anang ilap laban RO kitai mega udah majak nambah belama ari 0.71 kena 28 Disember 2021 ngagai 0.89 kena 9 Januari 2022.
"Taja pia,amat ngenyinuka ati laban nyentuk ke diatu urung 2,268 iku rayat Sarawak parai ketegal rampit COVID-19,"ku iya.
Iya madah munyi nya nengah Facebook iya pengudah ngulu aum sechara virtual begulai enggau Chairman Komiti Mutarka Penusah Ngenyit Negeri Sarawak (JPBNS) ke mega Sapit Kepala Menteri, Datuk Amar Douglas Uggah Embas ensana.
Dr Sim ke mega Menteri Pengerai Mensia Mayuh, Pengawa Berumah enggau Kaunsil Kandang Menua madah, Sarawak mega negeri ti rayat iya ke pemadu mayuh nerima vaksinasyen COVID-19 di Malaysia.
Ku iya, nyentuk ke diatu 91.7 peratus orang besai tuai ti tau u dah betuchuk dos satu enggau dua di negeri tu lalu 87.9 peratus nembiak ke tau, udah betuchuk dos satu enggau dua.
Ungkup dos 'booster', Dr Sim madahka ari Oktober 2021 nyentuk Januari 2022, dianggarka lebih 1.81 juta orang besai tuai rayat negeri tu tau betuchuk dos booster tang semina 74.2 peratus ti betuchuk lalu 468,904 agi, bedau be tuchuk dos booster.
Ku iya,semina 59.3 peratus sida ke beumur 18 nyentuk 29 taun udah betuchuk dos booster.
Iya ngansak rayat negeri tu betuchuk dos booster laban diatu kes varian Omicron udah nambah di Semenanjung enggau Sabah sebedau nya nambah di Sarawak.
"Kitai kelimpah ngelaluka langgur penemu Menteri Pengerai Khairy Jamaluddin enggau Opis Menteri Pengerai Malaysia (KKM)bejalaika vaksinasyen ngagai sida ke beumur lima nyentuk 11 taun.
"Bisi 272,500 iku nembiak mit ti tau di Sarawak enggau ba Program Imunisasyen COVID-19 Menua tu," ku iya madah nyemetak.