TU AJA?: Leon nunjukka pagar ti tumbang ba taba sepital baru Sri Aman nya.
Berita ke dipansut semina ngayanka sebana rayat ti deka nemu kebuah projek nya lama tepagang
KUCHING: Ketuai DAP pampang Sri Aman, Leon Jimat Donald kemari madahka diri ukai deka ngiga publisiti ketegal ngemansutka penanggul pasal projek ngaga sepital baru Sri Aman ba media.
Iya madahka diri semina mantaika sebana rayat Sri Aman ke deka nemu pengamat kebuah projek nya tepagang, ti dikumbai iya ‘sakit’.
Kaban Kunsil Nengeri Simanggang, Datuk Francis Harden Hollis patut nemu tanya ke enda ngengetu bekaul enggau projek nya ari mensia mayuh, ari ti nganu DAP ketegal mantaika pekara tu, ku iya.
“Rayat di Sri Aman enda ulih agi nerima semaya sentang kebuah sepital baru nya lalu bedau digaga. Nyentuk kemaya rayat di Sri Aman ulih nganti?,” ku Leon, ke mega Mandal chairman DAP Sarawak, kemari.
Iya bejaku munyi tu nimbal penerang ti dipansutka Harden ensanus di The Borneo Post ti madahka, Leon semina ngiga publisiti murah sereta nguntungka politik iya empu aja negah chara bekelikuhka penanggul projek sepital baru ti tepagang nya.
Harden ke mega Menteri Muda Pengawa Berumah enggau Pemansang Menua Pesisir madah, projek nya ukai ‘ sakit’ tang ba renggat keterubah tu, pengawa nambun tanah sereta nyendiaka palan endur ngaga projek nya benung dipejalaika.
Ku Harden nandu, pengawa ngaga langkar sepital nya patut dikemendarka kena pun taun tu enti konsultan udah datai meresa pemujur pengawa nambun tanah ba endur.
Projek ke beungkus RM200 miliun nya sebengkah ari projek ti diungkupka ba Sarawak, lebuh Menteri Besai Datuk Seri Najib Tun Razak nemuai kitu dalam taun 2011 suba.
Nitihka berita ti dipansutka ba media sebedau tu, projek ba Phase I nya beungkus RM9 miliun lalu laluh ungkus ke bukai nya ari baruh Phase 2, kena ngaga langkar sepital nya.
Sepital baru nya beguna amat laban sepital ke diatu ke udah dibuka kenyau ari taun 1959, enda tetapi pemayuh mensia ke begunaka penyikap nya.
Ku Leon, lebuh nimbal penerang ari Harden sentang pengawa nambun tanah ba palan projek nya, iya empu pan enda tentu nemu sentang tikas pemansang ngaga sepital baru nya.
“Bepelasarka rikod ti udah, semina 28 peratus aja tanah udah ditambun dalam kandang tiga taun, enti baka nya kitai deka nganti 6 taun agi baru semua kandang sepital baru tembu ditambun ngena tanah magang.
“Nitihka penerang ti tau dikearapka bekaul enggau pengawa nambun tanah, semina 14 ikar ari 50 ikar tanah ke deka endur ngaga sepital nya udah tembu ditambun.
“Kami deka nanya Datuk Francis Harden, nama kebuah semina 14 ikar tanah nya aja ditambun, ti sepatut iya 28 peratus ari semua penyampau pemujur pengawa dipejalaika dia dalam kandang tiga taun’?
“Nama utai deka digaga sida ba teda 72 peratus kandang menua ke mengkang babas sereta paya. Ni maya perintah deka belabuh nirika sepital nya,” ku iya.
“Nama utai ti deka digaga sida ba 28 peratus kandang menua nya? Rayat deka nemu. Enti nitihka penerang ti tau dikearapka, penyampau bangunan ke deka digaga ba sepital baru nya, ari 8 buah udah dikurangka ngagai 4 buah aja,” ku iya.
Iya minta perintah Barisan Nasional ‘Keamatka Mih Semaya Kita’, anang ngemelika rayat di Sri Aman sekali agi, ku iya.
“Kami enggai meda sepital ke enda chukup manah digaga ke rayat di Sri Aman, ketegal pengilap perintah! Kami dekaka sebuah sepital ti manah laban kami udah nganti lebih ari 50 taun.”
28 PERATUS AJA: Sebagi ari gambar ti mandangka projek ngaga sepital baru Sri Aman.