MANAH UNGKUP MENUA PESISIR: Wan Junaidi (duduk tengah) dikelingi kaban SARES bejaku ngagai pengerang berita kemari.
KUCHING: Opis Menteri Dalam Menua (KDN) deka nyikap Sarawak ngena perengka penyambung ‘emergency radio’ baka ke dikembuan Opis Polis, JPAM enggau RELA di Putra Jaya.
Nitih penerang Sapit Menteri Dalam Menua Datuk Dr Wan Junaidi Tuanku Jaafar perengka enggau teknologi ke dikena Sarawak Amateur Radio Emergency Service (SARES) ulih mantu sereta nyendiakka arus penyambung lebih agi di pesisir Sarawak enggau Sabah.
SARES ulih mantu nyendiaka servis radio penyambung ngagai mayuh bengkah ejensi perintah sereta mantu tim penusah ngenyit bekangauka pangan diri maya penusah bisi nyadi ba kandang endur ke nadai arus penyambung baka telefon.
Nengeri bukai baka Perak, Pahang, Kelantan sereta Terengganu tau bulih penguntung ari sistem servis radio tu ti bekenaka arus radio ‘Very High Frequency’ (VHF) tauka ‘Ultra High Frequency’ (UHF),” ku iya.
Iya mansutka jaku tu ba sebengkah aum pengarang berita pengudah mendingka licha senentang guna sistem servis radio ke disedia SARES ba Opis Servis Parlimen Santubong, Jalai Kulas ditu, kemari.
Wan Junaidi mega madah, sistem SARES nya manah agi ari sistem telefon satelit lalu ulih dikena taja pan gaya hari enda manah ke alai telefon satelit sigi enda ulih dikena enti gaya hari jai.
“Ari peneleba ke kala diasai aku, telefon satelit semina ulih dikena enti nadai mua hari ba langit. Sistem ke bansa tu enda engkeman ba menua kitai ditu,”ku iya.
SARES dikemendar rejister ari Opis Pengerejister Gerempung (ROS) kena 22 Oktober 2013 lalu diatu udah ngembuan 60 iku kaban ke landik ba sistem penyambung bekenaka radio.
Servis SARES ulih mungkur mayuh kandang menua di Sarawak nyengkaum Kuching, Matang, Petra Jaya, Batu Kawa, Bau, Lundu, Serian enggau Kota Samarahan.