LIMBANG: Kaunsil Pengelantang Pendiau, Lumba enggau Main Raban Pengereja Pengawa Perintah Malaysia (MAKSAK) Orang Indu Limbang mesti ngenegapka agi solidariti sereta pengeransing bekerejasama nyadi sebuah gerempung ti proaktif.
Residen Bagi Menua Limbang Ir hmad Denney Ahmad Fauzi madahka peminta nya seriris enggau tanggungpengawa MAKSAK tu empu iya nya ti proaktif dalam mayuh macham aktiviti pengelantang pendiau sereta lumba enggau main.
“Tu beguna kena nentuka MAKSAK Raban Orang Indu Limbang deka seruran mansang, relevan dalam bejalaika tanggungpengawa ti efektif agi,” ku iya ba Pengerami Makai Lemai MAksak Raban Orang Indu Limbang 2021/2022 ditu kilah ensanus.
Program ti diatur Komiti MAKSAK Raban Orang Indu Limbang nya udah digulu Chairman MAKSAK Raban Orang Indu Limbang Rosnah Tangkong, Pemesai Lumba enggau Main Limbang Margret Sawing sereta Pemesai Opis Pemadah Pelilih Menua Limbang Linda Padan.
Denney ke mega Chairman MAKSAK Bagi Menua Limbang dekaka komiti MAKSAK Raban Orang Indu Limbang ngambika seruran nitihka Prosedur Operasyen Standard (SOP) ti ditetapka perintah lalu ngemeranka ‘norma’ baru.
“Tu iya nya kena nentuka pengerai sereta pengelikun diri, ruang bilik sereta komuniti,” ku iya.
Ba pengerami nya, iya minta semua kaban MAKSAK Raban Orang Idnu sereta pengereja pengawa perintah kelebih agi ngambika ngerejista diri nyadi penerima vaksin COVID-19.
Dulu ari nya Denney mega meri besai pengaga ati ngagai komiti ti baru ditumbuh sereta dichiri ungkup penggal 2021/2022.
Iya mega beterima kasih sereta ngenang pengawa komiti ke lama laban ti udah meri tanggungpengawa sida ngelama tu.