KUCHING: Projek jalai alun Lingga-Sebuyau deka berengkah digaga pun taun 2021.
Menteri Muda Infrastruktur enggau Pemansang Palan Penyangkai Kapal Datuk Julaihi Narawi madah, langkar projek nya udah tembu digaga.
“Projek jalai alun ari Sebuyau ke Lingga udah dikemendar dipejalaika ari baruh program penyambung jalai besai kedua.
“Jalai tu iya nya siti ari jalai penyambung menua pesisir ti dikemendar sereta dipelanja penuh Perintah Sarawak.
“Skop jalai tu ti 33 Kilometer pemanjai ari kandang endur Sebuyau ke Lingga, iya nya mungkur pengawa ngaga jalai bansa ‘single carriage, dua lurung’ bansaR5 JKR standard,” ku iya.
Julaihi mansutka pekara nya lebuh nyaut tanya ari Simoi Peri (GPS-Lingga), ti nanya kemaya enggau skop projek jalai Lingga-Sebuyau ba aum hari ke dua, Aum Kedua Penggal Kelima Kunsil Nengeri Sarawak Ke-18 ti diatur ba Kompleks DUN ditu, kemari.
“Nambahka nya deka bisi sebuah jematan meraka Sungai Lingga ti pemanjai 650 meter enggau siti agi jematan mit ba Sungai Lingga awakka jalai nya ulih besambung nyentuk ke pasar Lingga,” ku iya.
Julaihi arap bendar penembu projek nya endang dianti peranak dalam kandang menua Lingga, laban nya ulih ngemandakka timpuh pejalai enggau penyauh fizikal kelebih agi enti peranak kandang menua nya deka ke Kota Samarahan enggau ke Kuching.
Nambahka nya iya madah projek nya mega ulih mai pemansang tikas sosial ekonomi peranak di menua pesisir.
Projek ti baka tu mega siti ari penetap ke beguna ngambika kandang menua pesisir kelebih agi di kandang menua Lingga enggau ke ngelinggi,sama ulih ngasaika pemansang ke udah diasaika kandang endur bukai, ku iya.
“Dikearapka pemansang pasar Lingga enggau Sebuyau deka bulih penguntung ari projek tu,” ku iya.