KUCHING: Randau Gabungan Parti Sarawak (GPS)-Parti Pesaka Bumiputera Bersatu (PBB) nyadi pelasar pemadu manah dikena parti ngenegapka raban pengawa bepilih parti napi pengawa bepilih ti deka datai.
Mandal Presiden Parti Pesaka Bumiputera Bersatu (PBB) Datuk Dr Abdul Rahman Junaidi madahka, mayuh macham pekara dikerandau nyengkaum chara nyikap diri enggau strategi parti napi pengawa bepilih ti deka ila.
“Nya alai, kami arap program randau baka tu ulih dikena ngenegapka raban parti kelimpah meri ulu lungga pengawa bepilih nyau udah semak,” ku iya maya Randau-PBB Dewan Kunsil Nengeri (DUN) Pantai Damai di Kampung Panglima Seman Lama ditu, malam Hari Lima empai lama.
Nitih ku Menteri Muda Pekara Islam enggau Dewan Mengeri Kuching Utara (DBKU) madahka, gaya orang ngundi di Sarawak bebida amat dibanding enggau nengeri bukai laban pengawa bepilih suah dipejalai entara Pengawa Bepilih Besai (PRU) enggau Pengawa Bepilih Nengeri (PRN).
“Nya kebuah, raban parti patut seruran besedia laban lebih kurang dua taun sekali kitai deka napi pengawa bepilih,” ku Dr Abdul Rahman ke mega Kaban Kunsil Nengeri (ADUN) Pantai Damai.
Ku iya madah, dipelaba Pengawa Bepilih Nengeri Ke-12 (PRN12) deka diatur dalam timpuh Atur Nagang Pemindah (PKP).
“Kitai patut besedia ngaga sekeda ubah dalam ‘norma’ baru ngambika penyukung kitai ulih bejalaika tanggungpengawa sida enggau lantang,” ku iya nerang.
Berebak enggau nya ku iya, kerejasama entara ketuai PBB Pampang enggau ranting mega patut diberi perati kena nentuka tetiap perambu bejalai enggau lanchar.
“Tu beguna amat ngambika tetiap strategi ke diatur kitai ulih dikemanahka enggau enda ngeruga penyikap pengawa kitai,” ku iya nambah.
Dulu agi ari tu, Kampung Seman Lama nyadi palan keenam randau pengudah Kampung Santubong, Kampung Jaya Bakti, Kampung Pasir Pandak, Kampung Semarang enggau Kampung Temenggong.