SIBU: Chairman Parti Sa’Ati Rakyat Sarawak (SUPP) Pampang Dudong Wong Ching Yong madah, pegai enggau atur perintah Gabungan Parti Sarawak (GPS) enda sama enggau BN (Barisan Nasional) lalu semina orang Sarawak aja nemu penanggul ti ditapi peranak ba kandang nengeri tu.
Wong mega ngansak rayat tauka pengundi ba Sibu ditu patut begempung sereta meri sukung ngagai semua chalun GPS ti bisi enggau besemekih ba Pengawa Bepilih Sitak Nengeri Ke-12 (PRN12) tu ila.
“Semua kitai patut andal sereta meri sukung penuh ngagai GPS. Pegai enggau atur perintah GPS tu endang bebida ari BN.
“Enti Bos (Ketuai/Chairman) BN, parti nya betuaika orang Semenanjung Malaysia tang Bos GPS tu dipegai Kepala Menteri kitai empu iya nya Datuk Patinggi Abang Johari ke mega siku ari peranak asal kitai di Sarawak.
“Semina orang Sarawak aja nemu penusah enggau penanggul ti ditapi peranak di nengeri tu. Nya alai, kitai ti anak Sarawak patut begempung ari baruh pegai Kepala Menteri kitai empu dikena nyaga hak enggau ke pemerat guna Sarawak,” ku Wong.
Wong bejaku munyi nya lebuh ti ngulu Program Begulai Enggau Rayat ba Rumah Peter Sayong di Durin kenaka 9 Februari tu, apin lama ti udah.
Berebak enggau nya, urung 16 iku Tuai Rumah (TR) ari Pelilih Dudong ditu iya nya TR Philip Kayak, TR Ujang, TR Lin, TR Brendan, TR George, TR Edwin, TR Nelson, TR Nancy, TR Jalima, TR Sadang, TR Murni, TR Kenneth, TR Sumbang, TR William, TR Nelson Surau sereta TR Peter Sayong empu, sama bisi ngulu program tu.
Dulu agi ari tu, TR Peter mega ngansak semua tuai rumah ba sitak nya patut bekerejasama sereta nyukung Wong ti nyadi chalun GPS/SUPP ungkup N52 Dudong ditu.
“Sama bela mih kitai bekerejasama enggau pangan diri lalu meri sukung ke penuh ngagai Wong, laban aku nemu iya siku orang ti bebendar lebuh ngereja pengawa.
“Iya mih penganti Datuk Dr Soon Choon Teck ke patut,” ku iya.