MIRI: Konvensyen Gabungan Parti Sarawak (GPS) ti diatur di Kuching ensana mandangka pengeransing misyen enggau visyen perintah nengeri dalam ngetanka hak rayat Sarawak.
Kaban Kunsil Nengeri Telang Usan, Dennis Ngau madah, mayuh isu rayat ke suah dikemulaka sekeda orang udah diterang ngagai delegasyen ke bisi ngulu pengawa nya.
“Konvensyen tu nyata bendar udah mandangka juluk GPS dalam ngetanka isu rayat sereta ngemansangka nengeri tu nitihka chara kediri empu,” ku iya ba siti penerang kemari.
Pekara bukai ke bisi dipejurai baka hal tanah enggau ekonomi, isu royalti minyak, Sempekat Malaysia 1963 (MA63) sereta isu ke semak enggau rayat Sarawak iya nya Bajet 2020.
Dennis nambah, konvensyen tu entara pengeransing perintah nengeri deka muai, nyeliah sereta nagang idealogi ke ulih nyarutka rayat kelebih agi ba kandang menua pesisir.
Perintah GPS ku iya udah ngungkupka belanja ti besai ba kandang menua pesisir dalam pengawa deka transformasyen endur nya lalu ngenyemakka bida pemansang mengeri enggau menua pesisir.
“Ba Bajet tu tadi, perintah nengeri nadai kakang ati nengah ngungkupka belanja ba pemansang enggau utai ke disemaya udah ditetapka.
“Dibanding enggau parti penyakal ari luar, sida enda ulih ngamatka manifesto Pengawa Bepilih Besai (PRU) ke udah nyentuk ke rayat leju enggau jaku semaya bula sida,” ku iya nyemetak.
Bisi 42 iku ketuai renggat baruh ari kontituensyen Parti Pesaka Besatu (PBB) Telang Usan ngulu konvensyen tu ngambika sama beratika misyen enggau visyen perintah GPS.
Dennis madah, konvensyen GPS keterubah diatur nya lebih mekuh sereta ngemeratka ba pengawa pemansang nengeri.
“Konvensyen tu mega ngempung semua kaban komponen parti lalu nyendiaka chalun maya Pengawa Bepilih Nengeri (PRN) ti deka datai ila,” ku iya.
Pengawa ke diatur di Palan Konvensyen Borneo Kuching (BCCK) nya dipenyadi Kepala Menteri ke mega Chairman GPS Datuk Patinggi Abang Johari Tun Openg begulai enggau tiga iku ketuai parti komponen GPS.
Pengawa tu udah digulu lebih 5,000 iku pengari ari empat parti komponen GPS iya nya Parti Pesaka Besatu (PBB), Parti Rakyat Sarawak (PRS), Parti Sa’Ati Rayat Sarawak (SUPP) enggau Parti Demokratik Progresif (PDP).