SIBU: Parti Sa’Ati Rayat Sarawak (SUPP) ngarapka bisi penerebai bilun terus ari Sibu ke Singapura dikena nyungkak sektor dagang temuai nengeri tu lebih agi tunga menua Rajang.
Chairman SUPP Pampang Dudong Wong Ching Yong madah, Singapura menua ke engkeman nambahka penatai pemisi sektor dagang temuai ditu.
Iya madah, penerebai bilun terus nya deka ngemuntang agi temuai datai kitu.
“Enti udah bisi ila dia bala temuai ulih datai terus ke Sibu meda pemanah rampa menua ditu.
“Sektor dagang temuai ba nengeri tu lebih agi menua Rajang agi mayuh ulih dikemansangka lalu dipeda tau bendar nyungkakka agi tikas penatai pemisi,” pia ku iya madah.
Iya mantaika penemu nya maya aum media ti bela digulu Sapit Presiden SUPP Datuk Chieng Buong Toon ba opis sida ditu, kemari.
Ku Wong, ngelama tu nengeri Sabah nerima penatai temuai ari menua bukai urung empat juta iku ninting taun.
“Pemanah rampa menua di Sarawak ditu nyauka sebaka enggau di Sabah.
“Tang nama kebuah penyampau temuai datai ti ba dua buah nengeri tu kelalu jauh enda sebaka?,” ku iya.
Nya alai, iya ngarapka Opis Dagang Temuai Sarawak (STB) landik agi berunding baka ngaga mayuh pakej nemuai di menua Rajang ngambika ulih matak penatai temuai.
Iya madah, ejensi nya meseti chakah ngangkatka menua Rajang nyadi palan nemuai ke manah ditapatka.
Ensana, Wong, Chieng enggau Sapit Chairman SUPP pampang Nangka, Chua Beng Seng sereta Sapit Chairman SUPP pampang Bukit Assek Yek Tiew Chiong udah nemuai ngagai opis AirAsia Sibu.
Penatai sida maya nya berandauka pekara bekaul enggau penerebai bilun terus Sibu ke Singapura enggau Sibu ke Pulau Pinang.
Kelimpah ari nya, sida bela berandauka pekara bekaul enggau servis AirAsia ti mai orang sakit berubat ke Kuching patut dikemanahka agi.