DUIT RAYA: Adenan nyuaka duit raya nembiak nyelai pendiau (OKU) enggau patu balu.
Seagi aku nyadi Kepala Menteri aku enda ngemendarka pekara tu nyadi di Sarawak
SARIKEI: Kepala Menteri Tan Sri Datuk Amar Adenan Satem enda begilik penemu madahka diri enda ngemendarka ukum Hudud dipejalaika di Sarawak.
Ku iya, raban ukai Islam di nengeri tu anang irau ati laban seagi iya nyadi Kepala Menteri, iya enda ngemendarka pekara nya nyadi di Sarawak ke diuan mayuh bengkah pupu raban bansa enggau jalai pengarap.
“Kami enggai meda rayat di nengeri tu ke balut penemu sereta penanggul ke bekaul enggau leka jaku ‘Allah’ ti benung angat dikejakuka mensia mayuh di Semenanjung Malaysia.
“Kitai ngemeranka ulah bebatak asur ba jalai pengarap. Ungkup kita ke merap jalai pengarap Islam, kita nadai hak ngajar raban bansa bukai pasal chara merap jalai pengarap enggau leka jaku ‘Allah’.
“Kitai naka pengabis deka ngelaban dua bengkah pekara tu ngambika enda tama ngagai nengeri tu sereta ngerachun runding rayat. Pekara paling ke pemadu beguna iya nya ngintu pengelikun nengeri sereta nyeliahka sekeda pekara kelebih agi bekaul enggau isu ti begedika bansa bukai,” pia ku iya ba Pengerami Ramah-Tamah Aidilfitri di Dewan Suarah Sarikei kemari.
Pengerami nya udah digulu urung 2,000 mensia mayuh ari pupu raban bansa. Bela ngulu pengerami nya Menteri Pemansang Rama Tan Sri William Mawan Ikom enggau Residen Bagi Menua Sarikei Dahim Nadot.
Ku Adenan berkata, dalam Atur Pemansang Malaysia Lumpar Ke-11 (RMK11,) iya besemaya deka minta mayuh agi ungkup belanja ari perintah besai ngambika Sarawak ulih sama nyingkang maju senggau sekeda nengeri bukai.
“Diatu endang amat negeri kitai jauh tinggal ari sekeda nengeri bukai kelebih agi nengeri di Semenanjung Malaysia.
“Enti dibanding gaya jalai, bekal ai, karan enggau penyikap perengkaguna uka, mengkang mayuh kandang endur, genturung pendiau enggau rumah panjai di nengeri bedau bisi perengkaguna nya.
“Taja udah bisi, tang kualiti perengkaguna ny a mayuh pengurang sereta enda ngemuaska ati,” ku iya.
Nya alai sukung penuh ari rayat ngagai bala ketuai perintah Barisan Nasional (BN) nengeri beguna amat kena nentuka Sarawak ulih terus nyingkang maju.
Verebak enggau nya, Menteri Muda Rampa Menua ke mega Menteri Muda ba Opis Kepala Menteri (Ngelakuka Pelajar Tenikal) Datu Len Talif Salleh maya ke bejaku madah, seiti ari pemansang ti ngemegahka ati rayat ditu sereta muka mayuh pengawa puang iya nya SCORE enggau Hab Halal Tanjung Manis.
“SCORE diatu udah matak bebiliun ringgit puku ari menua luar ngagai nengeri kitai nengah industri bepelasarka nguna kuasa tau dikena baru dikena ngangkatka pemansang menua tu ngambika manggai ba tikas ke tinggi agi.
“Nya deka nambahka penyampau peranak menua tu enggau guna pengereja pengawa ke mayuh iya nya 1.6 miliun iku nyerumba taun 2030,” ku iya.
Ku iya, perintah nampai jauh sereta ngemeratka bidang teknikal kelimpah ari ngemanahka sekeda institusyen endur nempa pengereja pengawa ke diguna ba SCORE dudi ila.
“Ukai semina nya aja, kami mega numbuhka Tabung Ekonomi Gagasan Anak Sarawak (TEGAS) dikena matak pengerindu nembiak rebak baru ngagai bidang nya.
“Semua tu deka nyungkak ekonomi sereta muka jalai pemansang baru ngagai kita di Sarikei enggau kandang menua ke kena bungkur SCORE kelebih agi ba Hab Halal Tanjung Manis.
“Pengawa numbuhka kolej ditu deka mai pemaik ngagai ekonomi kitai,” ku iya.
Beserimbai enggau pengerami nya, Adenan udah ngemendarka ungkup belanja RM500,000 dikena ngemanahka Masjid Al-Mutaqim Sarikei lalu RM45 juta agi dikena ngemanahka jalai alun ari puak pasar Sarikei nuju Genturung Pendiau Seberang enggau Susur Jambu.