SRI AMAN: Kaban Kunsil Nengeri (ADUN) Lingga Simoi Peri dekaka pengerami besai ti diintu semua rayat di menua tu dijadika siti pengerami begulai ungkup semua komuniti di menua tu.
Ku iya, nengah pengerami besai baka Hari Raya, Deepavali, Gawai, Taun Baru China tauka Krismas nyadi siti pelasar ti manah dikena ngenegapka agi penyerakup komuniti pupu bansa di menua tu.
“Endang nyadi tanggungpengawa besai perintah ngempung rayat dimenua tu ti pupu bansa nyadi siti gempung komuniti ke bela bebasaka pengerami pupu bansa di menua tu,” ku iya.
Iya madah munyi nya lebuh ti bejaku di Program Ngintu Hari Krismas Renggat Rumah Panjai Kunjang Reja, Sungai Daun, Maludam enda jauh ari Betong pagi kemari.
Beserimbai enggau nya, Simoi mega nyemetak madahka nengah pengerami ti diintu di menua tu, tu mega siti peluang ngagai komuniti pupu bansa ngambika ngabang ke pengerami nyambut pengabang bansa ti ngintu pengerami nya.
“Chunto nya ba musim pengerami Hari Krismas tu, bansa bukai baka bansa Melayu enggau China mega bisi peluang ngabang ke rumah bala bakih sida ti ngintu pengerami tu enggau tuju deka ngerapitka agi kaul enggau pangan diri.
“Anang ngasai malu datai ke rumah sida ti ngintu pengerami nya laban tu mih siti peluang ti berega ngagai kitai semua belajarka main asal sereta adat komuniti ti ngintu pengerami tu,” ku iya nambah.
Berindik ari nya, mayuh aktiviti sama bisi diatur maya pengerami nya nyengkaum pekit karaoke, pekit kumang enggau keling sereta pengawa meri bantu ngagai 18 iku orang lunggar umur ari rumah panjai nya.
Dulu agi ari nya, pengerami Hari Krismas ba rumah panjai nya diatur begulai Komiti Pemansang enggau Pengelikun Genturung Pendiau (JKKK) Rumah Kunjang Reja enggau Palan Servis Komuniti DUN Lingga.