KUCHING: Tiga iku ti kala nyadi Kaban Kunsil Nengeri (ADUN) ari Parti Sarawak Bersatu (PSB) deka dipindah ari blok penyakal ngagai blok perintah ba tusun penuduk maya Aum Kunsil Nengeri (DUN) Sarawak berengkah Hari Satu (6 Mei) tu.
Semua sida tiga, iya nya ADUN Bawang Assan, Dato Sri Wong Soon Koh; ADUN Engkilili, Dr Johnical Rayong; enggau ADUN Ba’kelalan, Baru Bian ke diatu udah nyadi kaban Parti Demokratik Progresif (PDP), parti komponen Gabungan Parti Sarawak (GPS).
Speaker DUN Sarawak, Tan Sri Datuk Amar Mohamad Asfia Awang Nasar madahka iya ti nyadi Speaker bisi kuasa nentuka tusun penuduk ADUN dalam DUN.
Ku iya, tiga ADUN nya bediri minta pilih sereta dipilih maya Pengawa Bepilih Nengeri (PRN) 2021, sida iya nadai nerima notifikasyen bekaul enggau Akta Anti Lompat Parti.
"Ubah Akta Anti Lompat Parti dikemendarka kena 22 November 2022 enggau diteritka kena 27 Julai 2023.
"Tang sida (tiga ti kala nyadi ADUN PSB) dipilih dulu maya PRN 2021 sebedau undang-undang nya dikemendarka.
"Nya alai undang-undang nya enda ulih dikena bejalaika aksyen ba sida tiga," ku iya.
Iya madahka pekara nya maya baum pengarang berita pengudah aum Pra-DUN ti bechairmanka Premier Datuk Patinggi Tan Sri Abang Johari Tun Openg ba Indu Opis PBB ditu, kemari.
Enggau ubah tusun penuduk dalam DUN Sarawak tu, blok penyakal diatu semina bisi dua iku iya nya ADUN Padungan, Chong Chieng Jen enggau ADUN Pending, Violet Yong.
Ngenang sadang penemu ADUN Padungan ngambika sistem adminstrasyen DUN Sarawak diaduka manah agi lebih agi bekaul enggau pangkat rasmi tuai penyakal, Asfia madahka nadai ditetapka dalam Perlembagaan Nengeri pasal pekara nya.
"Kelimpah ari penyakal deka mantaika mosyen kena ngubah Perlembagaan Nengeri ti begunaka sukung dua pertiga majoriti," ku Asfia.
Chong ensanus madahka nadai pangkat rasmi tuai penyakal dalam DUN Sarawak enda sebaka enggau di Parlimen ti bisi siti pangkat rasmi sereta sida nerima penguntung baka bisi pemantu enggau sekretari.
Berindik ari nya Chairman DAP Sarawak nya ngasaika patut bisi sistem adminstrasyen DUN Sarawak diaduka manah agi baka DUN Selangor enggau Pulau Pinang.