MIRI: Bisi tiga fasiliti lumba enggau main di Miri benung sereta deka dipejalaika pengawa ngangkatmanah ungkup dikena ngatur Lumba enggau Main Malaysia (SUKMA) Ke-21 2024 Sarawak ti ngena ungkus sepenyampau RM7 juta.
Ketuai Pemesai Eksekutif Perbadanan Sukan Sarawak (SSC) ti mega Direktor Kaunsil Lumba enggau Main Nengeri Sarawak (MSNS) Awang Putrayusrie Awang Redzuan madahka tiga fasiliti lumba enggau main di Miri ti dikemendarka perintah Sarawak iya nya nengah Opis Menteri Nembiak, Lumba enggau Main enggau Pemansang Orang Dagang ngambika diangkatmanah iya nya Stadium Miri, Stadium Bandaraya Miri enggau Kampung Sukan Petronas.
“Pengawa ungkup Stadium Bandaraya Miri tu udah berengkah dipejalai lalu diatu udah 40 peratus, nitihka timpuh lalu dipelabaka tembu sebedau Julai.
“Ungkup Stadium Miri, kitai baru nyiri kontraktor lalu pengawa deka berengkah dalam timpuh minggu ti deka datai, pia mega enggau palan endur diau lumba enggau main deka berengkah diangkatmanah minggu ti deka datai sereta 'InsyaAllah' deka tembu sebedau SUKMA 2024,” ku iya.
Iya madah munyi tu ngagai pengarang berita lebuh ti ngelawa pengawa ngangkatmanah enggau nyeruri di Stadium Miri ditu, kena lemai Hari Enam.
Sama bisi datai merika penerang bekaul tikas pejalai pengawa ngangkatmanah fasiliti lumba enggau main tu iya nya Ketuai Zon Utara SSC Netty Elvis.
Nitih ku Awang Putrayusrie pengawa ngangkatmanah enggau nyeruri fasiliti lumba enggau main tu digaga ba semua semilan bagi menua ti bekaul enggau dalam pengawa ngatur program lumba enggau main maya SUKMA Ke-21 2024 Sarawak lalu naka ke diatu udah dipejalaika enggau lanchar.
“Ungkup Miri, agih belanja kitai pinta enggau perimtah dikena Stadium Bandaraya ti bisi besai agi iya nya urung RM4 juta ungkup ngangkatmanah enggau nyeruri, baka ti ditemu kitai stadium tu suah dikena ungkup program besai ukai semina program lumba enggau main.
“Pia mega ungkup Stadium Miri, kitai minta agih belanja RM2 juta lalu palan endur diau lumba enggau main urung RM1 juta ungkup pengawa nyeruri,” ku iya nerang.
Taja pia, iya madahka penyampau tu iya nya agih belanja ti dipinta raban sida ari perintah tang pengudah nyiri kontraktor deka nurun ngagai ikas siling agih belanja ke dipinta.
Awang Putrayusrie madahka perintah Sarawak ngagihka bajet ti besai dikena ngatur SUKMA sekali tu laban tu iya nya program lumba enggau main ti besai kenyau ari tu berengkah diatur dalam taun 1986 lalu diatu bisi 37 bansa lumba enggau main ti ngaul 484 kategori lumba enggau main.
SUKMA Ke-21 Sarawak deka diatur kena 17 nyentuk 24 Ogos ti deka datai.