KUCHING: Sarawak ngelaluka perambu ungkup nengeri tu meri bayar deposit minimum RM2 juta tauka meli reta tanah enda kurang ari RM1.5 juta ngagai raban orang dagang ti deka mindah ke nengeri tu.
Premier Sarawak Datuk Patinggi Tan Sri abang Johari Tun Openg madahka perambu Sapit Menteri Besai (TPM) Dato Sri Fadillah Yusof tu endang patut ngagai sida ke deka bulih status peranak mendam di nengeri tu.
“Aku setuju enggau TPM, mayuh ti minta pindah ke Sarawak laban ekonomi kitai manah lalu kitai udah lebih ari Johor sereta enda lama agi nyangka Selangor.
“Nya alai mayuh sida deka mindah ngagai kitu, tang kitai dekaka sida ti ulih mai idea baru.
“Perambu tu manah, deka status peranak mendam, ukai status peranak Sarawak, lapa enda. Kitai deka berundingka tu,” ku iya.
Iya madah munyi tu ngagai pengarang berita lebuh ti dipinta meri buah runding bekaul enggau perambu TPM pengudah bejadika pengerami Ai Sedunya Renggat Nasional ba Tebing Sungai Kuching, ditu kemari.
Ku Abang Johari agi, Singapura udah bejalaika polisi tu ke alai siku menteri Singapura iya nya asal ari Miri.
Berindik ari tu, iya ngelaluka perambu baka tu laban tu ditaka ungkup sida ti deka mendam lalu ukai status peranak Sarawak.
Kena Hari Enam, Fadillah udah merambu ngambika Sarawak meri bayar deposit minimum RM2 juta ngagai dalam bank menua tu tauka meli reta tanah enda kurang ari RM1.5 juta ungkup raban orang dagang ke deka mindah ke nengeri tu.
Nitih ku Fadillah, pengelantang enggau pemanah politik Sarawak nyadi entaraa pekara besai ti matak mayuh bakih dagang di Semenanjung deka mindah ke nengeri tu.
Enggau penetap tu, tu ambis nadai ulih nyungkak penatai pemisi nengeri kelimpah ari sida ulih bulih status peranak mendam di Sarawak, ku Fadillah.