KUCHING: Perintah Sarawak setuju numbuhka enam agi Pusat Sehenti Intervensi Awal (OSEIC) dalam timpuh enam taun ti deka datai berengkah ari taun 2025 ngagai 2030.
Menteri Pemansang Indu, Nembiak Mit enggau Pengelantang Komuniti, Dato Sri Fatimah Abdullah madahka, OSEIC nya deka ditumbuhka di Bintulu, Betong, Lawas, Kapit, Serian enggau Samarahan.
"Taun tu kitai deka numbuhka OSEIC di Miri dalam bulan Oktober tu, kena nambahka OSEIC ke endang udah bisi iya nya sebuah di Dalat enggau sebuah agi di Kuching.
"Di Sibu kitai enda numbuhka OSEIC, laban udah bisi Pusat Agape ti nyendiaka servis ti sebaka enggau OSEIC," ku iya.
Pekara nya dipadahka iya maya baum pengarang berita pengudah nyadi chairman Aum Komiti Penyanding Penemu OSEIC di Begunan OSEIC, Metrocity ditu, kemari.
Ngenang silik pasal OSEIC, Fatimah madahka berengkah beoperasyen dalam bulan Oktober 2020 enggau penyampau pelatih nembiak mit bisi 30 iku ti nyengkaum mayuh bengkah penimpang pendiau.
Diatu ku iya, OSEIC Kuching di Metrocity bisi 489 pelatih nembiak mit beumur biak ari tujuh taun.
"Batang tuju penumbuh OSEIC iya nya dikena nyendiaka servis intervensyen tumu ngagai nembiak mit timpang pendiau ari raban B40.
"Palan swasta bisi tang enda chukup sereta enda semua kelebih agi apai indai B40 ulih mayar," terang iya.
Ku Fatimah, intervensyen tumu amat beguna kena nentuka nembiak mit timpang tauka nyelai pendiau ulih belajar ba sekula perdana tauka Program Pendidikan Khas Integrasi (PPKI).
"Tikas pemujur manah agi enti intervensyen dipejalaika maya umur agi mit, sereta dalam timpuh entara taun 2022 ngagai 2024, bisi 27 nembiak mit ti dilatih di OSEIC ulih masuk sekula perdana, enggau bisi 137 iku masuk PPKI.
"Pengirau kitai diatu iya nya apai indai di menua pesisir ti enda bulih servis intervensyen tu ketegal penyauh (ari palan OSEIC) tauka penanggul pengangkut.
"Nya kebuah kitai deka ngerembaika agi OSEIC awakka mayuh agi nembiak mit nyelai pendiau ulih ngasaika servis tu," ku iya.
Sama bisi datai, Sapit Menteri Pemansang Indu, Nembiak Mit enggau Pengelantang Komuniti, Datuk Rosey Yunus; Tuai Bagi Pemansang Tumu Nembiak Mit, Salina Bujang enggau Sapit Sekretari Mendam Opis Menteri nya, Colliner Gohe.