Dikarang Rengayan Labang
KUCHING: Opis Menteri Industri Pemakai, Komoditi enggau Pemansang Wilayah Sarawak (M-FICORD) nengah Opis Betanam Betupi Sarawak belalauka inisiatif nengeri bukai baka Sabah ba pengawa numbuhka Opis Berikan Sarawak.
Sapit Menteri Industri Pemakai, Komoditi enggau Pemansang Orang Dagang Sarawak, Datuk Sri Abdul Rahman madahka, pengawa numbuhka Opis Berikan benung dalam proses sereta dikearapka ulih dibantaika maya baum Kunsil Nengeri (DUN) bulan November taun tu.
Iya madahka, sebedau tu semua sektor iya nya utai tanam, veterinar enggau berikan dipegai siti opis iya nya Opis Betanam Betupi Sarawak tang diatu perintah Sarawak bejalaika inisiatif iya nya tiap sektor nya dipegai opis nya kediri empu awakka ulih fokus.
"Kitai udah mujur numbuhka Opis Veterinar dua taun ti udah. Diatu kitai dalam proses numbuhka Opis Berikan awakka opis tu ulih fokus ngangkatka industri berikan.
"Diatu (proses numbuhka opis berikan) benung dalam langkar, kitai ngaga penisih tumu, enggau kita dalam proses betemu enggau nengeri ke bisi opis (berikan) tu baka Sabah.
"Kitai deka nguji enti ulih ambis laun maya baum Kunsil Nengeri (DUN) bulan November ke deka datai (2024) tauka enti bedau besedia dipelabaka deka dibantaika ba DUN maya baum taun baru," ku iya.
Dr. Abdul Rahman nerangka pekara nya lebuh dirandau raban pengarang berita pengudah iya bejadi Konvensyen Usahawan Tani (KUT) 2024 ti diatur Opis Betanam Betupi Sarawak ba sebengkah hotel ditu, kemari.
"Enti Opis Berikan udah bisi ila, semua iya udah chukup iya nya opis ke ngemataka produk-produk tauka industri-industri ti chukup beguna dalam sektor betanam betupi, iya nya utai tumbuh ti nyengkaum buah, udah nya veterinar enggau kepenudi berikan, nya inisiatif perintah Sarawak," ku iya.
Dalam taun 2022, Menteri Industri Pemakai, Komoditi enggau Pemansang Orang Dagang Sarawak ti sebedau tu dikelala Menteri Betanam Betupi Moden enggau Pemansang Wilayah Dato Sri Dr. Stephen Rundi Utom kala madah, pengawa numbuhka opis baru nya (Opis Berikan) deka meri awak ngagai perintah nengeri nyeraris tadbir urus dalam sektor berikan di Sarawak.
Bekaul enggau KUT, Sapit Direktor Sektor Operasyen, Opis Betanam Betupi Sarawak, Radziah Jack madahka, KUT 2024 entara aktiviti besai Opis Betanam Betupi kena ngerami genap 100 taun opis nya ditumbuh kenyau ari taun 1924.
Objektif konvensyen, ku iya, siti platform kena bekunsi penerang, mandangka produk enggau teknologi pemadu baru kelebih agi ngagai orang dagang tani enggau pegawai di opis betanam betupi.
"Konvensyen ti diatur tiga hari (24 ngagai 26 April) ngena rambai jaku ' Transformasyen enggau Ngenegapka Orang Dagang Tani'.
"Lalu rambai jaku konvensyen tu ngayanka chara kena nguna chara ti lebih moden, bisi inovasyen enggau beteknologi dalam transformasyen industri pemprosesan betanam betupi awakka ulih nempa orang dagang ti ulih besemekih," ku iya.
Nitihka Radziah urung 150 iku orang dagang enggau pegawai pembimbing ari mayuh bengkaj ejensi ngulu KUT 2024.
Bisi 15 keretas kereja dibantaika pegawai ari ejensi tauka syarikat, kelimpah ari bisi 20 bansal pemandang dibuka ti nyendiaka servis engga sanding penemu ari ejensi enggau syarikat swasta.
"Aku pechaya konvensyen pengelama tiga hari tu deka nguntungka semua ti ngambi bagi iya nya ulih ngemaru enggau ngenegapka penemu sida pasal kereban nyendiaka bantu belanja, teknologi enggau inovasyen pemadu baru, lisin enggau setipikit, standard kualiti enggau pemanah pemakai nya diempa," ku iya.
Sama bisi datai ba pengerami tu, Sapit Menteri Industri Pemakai, Komoditi enggau Pemansang Orang Dagang Sarawak, Datuk Martin Ben; Sekretari Mendam Industri Pemakai, Komoditi enggau Pemansang Orang Dagang Sarawak, Sirai Daha enggau sida ti bukai.