SERIAN: Opis Lada Malaysia (MPB) bejalaika program pematau pemayuh takar rachun indu utai dikena ba lada ti ulih meri impak ngagai rega lada kelimpah ari dikena nyaga kualiti.
Tuai Direktor iya, Vincent Sawat madahka sida deka ngenyakahka pengawa pematau ngena rachun indu utai dikena nentuka takar pemayuh rachun ti betul seruran dititih enggau dikemeranka penanam lada di Malaysia, seraya kena nyaga kualiti enggau pengelikun pemakai ti digaga ari lada.
"Kitai mega suah ninga sebana tauka timbal ari pekebun lada madahka rega lada tusah deka niki, lalu siti ari kebuah ti ngeruga rega lada kitai iya nya pemayuh rachun dalam produk lada kitai.
"Nya kebuah kitai diatu bejalaika pengawa pematau di ladang tauka kebun lada, iya nya kitai ngambi sampel tauka chunto buah lada kena matau pemayuh rachun ke dikena.
"Laban bisi dua pekara ti dikemeratka kitai, keterubah, ngena rachun ti betul iya nya rachun ti semina diregister ungkup komiditi lada ti dikemendarka dikena ba kebun lada, kedua, ngena rachun ti enda diregister tu enda enda dikemendarka dikena ba lada. Suah nyadi iya nya ngena rachun mayuh ari ti ditetapka," ku iya.
Iya madahka pekara dalam jaku pengelalu pengerami nutup Program Ngenegapka Pengemeran Industri Lada 2024 ti diatur MPB di Dewan Babuk Barum, Kampung Bunan Gega/Punok, Tebedu ditu, sereta dipenyadi Sapit Menteri Industri Pemakai, Komoditi enggau Pemansang wilayah Sarawak, Datuk Martin Ben, kemari.
"(Ambika chunto) Enti sehari tu kitai manchitka rachun indu utai nya anang lalu pagila buah lada nya digumpul ari tu pemayuh rachun dalam buah nya tinggi, ke patut urung dua minggu udah dipanchit ngena rachun baru tau digumpul.
"Enti pemayuh rachun dalam produk kitai enda ulih dijaga, nya ti ngujungka rega lada kitai tusah deka nitki, nadai orang deka meli. Tu isu ti difokus kitai," ku iya.
Nitihka iya, naka Disember 2023, bisi 269 sampel tauka chunto ari serata Malaysia udah dianalisi enggau sepenyampau 54 sampel ditemu bisi mayuh rachun indu utai tang agi ba tikas maximum residue limit (MRL) ti dikemendar.
"Berindik pekara nya aku ngarapka pekebun lada ulih nitihka chara ngena rachun indu utai enggau betul awakka produk selamat dikena pemeli," ku iya.
Kelimpah ari nya, Vincent ngenang statistik penyampau lada ditanam enggau penerima bantu ari MPB dalam kandang menua Serian madahka, naka bulan Mac 2024 bisi 6,400 pekebun lada dalam Parlimen Serian beregister enggau MPB enggau pemesai kebun dipelaba 1,280 hektar.
Pemansut lada ungkup bagi menua Serian aja dianggar sepenyampay 6,400 metrik tan.
Kenyau ari taun 2021 ngagai Mac 2024, bisi 779 iku pekebun di Bagi Menua Serian udah dibantu ari baruh Skim Tanaman Lada Baru (STLB) ti mungkur pemesai 98.1 hektar enggau penyampau bantu sepenyampau RM3.7 juta.
Bisi 874 iku pekebun udah ngasaika penguntung ari Skim Tanaman Lada Matang (STLM) ti mungkur 143 hektar enggau penyampau bantu dianggar sepenyampau RM2.4 juta dalam timpuh ti sama (kenyau ari taun 2021 ngagai Mac 2024).