Palan tu deka digaga ba tengah tasik ti ditambah tanah baru, nyungkak energi gadung
“Kitai deka ngaga sebuah palan penyangkai kapal baru ba Tanjung Embang tang tu enda digaga ba tanjung nya. Tu deka digaga ba tasik lalu kitai deka nambahka tanah ungkup tuju tu. Tu deka dikelingi ai tasik tang enda begelumbang... Tu iya nya chara baru dalam ngaga palan penyangkai kapal.
Datuk Patinggi Tan Sri Abang Johari Tun Openg
Premier Sarawak
KUCHING: Sarawak deka ngena model Palan Penyangkai Kapal Osaka, Jepun enggau Palan Penyangkai Kapal Shanghai, China dikena ngemansangka palan penyangkai kapal ti baru ba Tanjung Embang.
Premier Sarawak Datuk Patinggi Tan Sri Abang Johari Tun Openg madahka perambu palan penyangkai kapal tasik dalam tu ti digaga ba atas tanah ke ditambak deka nyendiaka servis ungkup Kuching enggau Sarawak.
“Kitai deka ngaga sebuah palan penyangkai kapal baru ba Tanjung Embang tang tu enda digaga ba tanjung nya. Tu deka digaga ba tasik lalu kitai deka nambahka tanah ungkup tuju tu. Tu deka dikelingi ai tasik tang enda begelumbang... Tu iya nya chara baru dalam ngaga palan penyangkai kapal.
“Osaka udah ngemansangka palan panyangkai kapal baka tu,” ku iya lebuh ti bejaku ba Pengerami Ramah Tamah Aidilfitri Pelilih Menua gedong ba sebuah hotel ditu, malam kilah ensana (Hari Minggu).
Bejaku enggau silik, Abang Johari madahka pemutus ngaga sebuah palan penyangkai kapal baru ba tasik di atas tanah ti udah ditambak tu iya nya enggau tuju nyeliahka aktiviti ngerumbak tebing pantai dipejalaika.
Iya madah, lebuh tu tembu ila, palan penyangkai kapal tu deka mantu ngemansangka agi bagi menua Kuching enggau Samarahan.
“Kitai enda ibuh ngerumbak tebing pantai di Tanjung Embang laban penalam tasik chukup pengudah nya ditambak.
“Lebuh tu tembu ila, palan penyangkai kapal tu deka nyambungka kandang endur tebing tasik lalu udah nya ke Samarahan enggau Gedong,” ku iya ti mega Kaban Kunsil Nengeri (ADUN) Gedong.
Disember nyin tadi, Abang Johari madah palan penyangkai kapal tasik dalam Tanjung Embang dipelabka deka nyungkak peminta energi gadung Sarawak.
Nitih ku iya agi, pemansang infrastruktur besai tu deka dipelanja perintah nengeri dalam pengawa ngenegapka pengeransing rentayan bekal ti bekaul enggau operasyen energi gadung.
Pengerami tu sama digulu bini iya Puan Sri Datuk Amar Juma'ani Tuanku Bujang, Sekretari Perintah Sarawak Datuk Amar Mohamad Abu Bakar Marzuki, Sapit Menteri Pemansang Desa enggau Wilayah Malaysia Datuk Rubiah Wang, Sapit Speaker Kunsil Nengeri (DUN) Datuk Idris Buang, Sapit Menteri Utiliti enggau Telekomunikasyen Datuk Dr Abdul Rahman Junaidi, Penyanding Penemu Opis Menteri Dagang Antarabansa, Industri enggau Beranakka Puku Sarawak Dato Sri Mohd Naroden Majais, Kaban Parlimen Batang Sadong Rodiyah Sapiee enggau Kaban Kunsil Nengeri (ADUN) Simunjan Awla Dris.