SIBU: Kampung Datu ditu deka dikemansangka enggau manah agi sereta dikerembaika agi kaul nya.
Premier Sarawak Datuk Patinggi Tan Sri Abang Johari Tun Openg madah, tu nyengkaum ngemansangka infrasturktur jalai alun, tebing sungai, pengawa berumah enggau ngaga sebuah palan konvensyen.
“Pengudah berandau enggau bala ketuai di Sibu, kitai deka ngemansangka baru Kampung Datu lalu kitai ngetanka nama ti udah bisi di Kampung Datu tang mesti bisi utai dikemaru, nyema kitai ngetanka baka diatu tusah, kitai mesti ngasuh moden kandang menua lalu ngetanka gaya budaya ke bisi di Kampung Datu enggau rampa menua ngelingi nya.
“Utai tu iya nya ti mantaika budaya, ke udah dipeturunka kitai sereta diberi di Kampung Datu, reti nya kitai 'Boulevard' ari masjid An-Nur terus ke tebing sungai. Lalu dikemansangka enggau genturung pendiau, rumah moden. Nyema Darul Hana ulih digaga, aku pechaya Kampung Datu Sibu mega ulih,” ku iya lebuh ti bejaku ba Pengerami Ramah-Tamah Hari Raya Aidilfitri Bagi Menua Sibu di Dewan Canselor Tun Abdul Taib Mahmud, Universiti Teknologi Sarawak (UTS) kena malam Hari Enam.
Iya mega madah, tebing Sungai Igan deka dikemanahka lalu ngembuan gaya ti ulih matak penatai enggau tebing sungai deka dikemansangka sebuah palan konvensyen, urung pemesai Dewan Canselor Tun Abdul Taib Mahmud, enggau gaya sereta perengkaguna ti moden ungkup Sibu laban tu deka betunga enggau tebing sungai (Waterfront).
Ku iya madah, dikena ngemodenka prasarana ke bisi di genturung pendiau asal Sibu tu, palan tu deka disambung enggau Kemuyang ngena jalai alun ti baru, semanjai 15 kilometer.
“Reti nya ari Kemuyang, tu deka nyambung ke Teku nyentuk ke UTS tu, lalu nyambung ngagai Kampung Datu. Reti nya Kampung Datu dikemesaika nyentuk ngagai Kemuyang.
“Kemuyang udah dikemansangka kitai, sebagi ari projek pengawa berumah lalu tu deka meri kaul mobitili, ngagai komuniti Sibu, enggau mobiliti begulai,” ku iya nyemetak.
Nitih ku iya, enggau pemansang tu deka nentuka Kampung Datu deka nyadi sebuah genturung pendiau ti baru ungkup kandang menua Nangka.
“Nya alai, tu mih ke deka dikemansangka kitai, lalu kitai udah pas, sereta udah tentu begunaka agih belanja ke besai, tang Insyallah... Kitai deka diberi agih belanja enggau dikemansangka ngena nama pan ke udah diperambu kitai. Tu iya nya ampung Datu nyengkaum Kampung Datu Baru ti besai,” ku iya.
Iya madahka, kelimpah projek pengawa berumah ke dikemansangka di Kemuyang sekeda kandang menua baru ari Kemuyang, Teku nyentuk ke Kampung Datu deka dibuka lebuh jalai baru tu tembu ila ke alai tu mega deka ngangkatka pemanah pasar Sibu.
Pengerami tu udah digulu urung 2,000 iku enggau penatai Tuai Pemegai Menua Nengeri Pehin Sri Dr Wan Junaidi Tuanku Jaafar enggau bii Toh Puan Fauziah Mohd Sanusi.
Sama datai iya nya Datuk Amar Juma'ani Bujang, Menteri Kereja Raya Dato Sri Alexander Nanta Linggi, Menteri Dagang Temuai, Seni enggau Budaya Dato Sri Tiong King Sing, Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah, Sapit Menteri Pelajar, Inovasyen enggau Pemansang Penau Datuk Dr Annuar Rapa'ee, Temenggong Datuk Wan Hamid Edruce Tuanku Mohamad enggau temuai dipebasa ke bukai.