SRI AMAN: Indu Opis Polis (IPD) Sri Aman mujur ngatur pengawa besembiang ba Gerija Katolik Mount Hosanna, Jalai Sri Aman-Kuching kena Hari Lima (ensanus), nyerumba pengerami Ngingatka Hari Polis Ke-217.
Pengawa besembiang nya sama dipasuk raban Pegawai Kanan Polis (PKP), Pegawai Rendah Polis (PRP), Pegawai AM (PA), kaban AMANITA, kaban Gerempung Ruang Bilik Polis Malaysia (PERKEP) enggau Kompeni 'C' BN 10 PGA, Kem Temudok ti megai pengarap Kristian sereta semua sida sebilik.
Sembiang nya diuluka Reverend Father Jerome Juleng.
Nambah nya, Tuai Polis Pelilih Menua Sri Aman DSP Mathew Manggie enggau bini iya Corina Nobes ti nyadi Chairman PERKEP IPD Sri Aman sereta sida sebilik sama datai ba pengawa sembiang nya.
Bejaku ba pengawa nya, Mathew beterima kasih ngagai Gerija Katolik Sri Aman laban ti meri awak ngagai IPD Sri Aman besembiang bebala mayuh ba gerija nya.
Nyerumba tu mega, Mathew bisi nyuaka pemeri ari Kelab Penganut Agama Kristian (KPAK) IPD Sri Aman ngagai gerija nya.