SRI AMAN: Semua tuai komuniti dikeingat ngambika terus bejalaika tanggung pengawa ngemajuka genturung pendiau enggau rumah panjai diri empu.
Kaban Kunsil Nengeri (ADUN) Bukit Begunan Datuk Mong Dagang bebendar madah tuai komuniti sekalika tuai rumah, tuai genturung pendiau, tuai raban bansa sereta ti bukai patut suah begulai enggau bala pemesai betemu enggau rayat kelimpah ari berandau tauka baum enggau rayat ti dijaga.
"Nengah pengawa berandau tauka baum, nya ngemudahka semua proses ngelanggur pemansang ti deka dikemansangka ba kandang endur diri empu," ku iya.
Mong madahka pekara nya maya bejadi 'Seminar Pembinaan Kapasiti Pemimpin Akar Umbi' ungkup sitak Kunsil Nengeri (DUN) Bukit Begunan ti dipegai Opis Pelilih Menua Pantu sereta nyuaka 'Sijil Pelantikan dan Pelanjutan Ketua Masyarakat serta Ketua Kaum (KMKK)' ti diatur di Dewan Sri Pantu ditu.
Bejaku baru iya madahka ngena chara nya, semua penerang pasal pemansang enggau penanggul ke nyadi ba tiap rumah panjai enggau genturung pendiau ulih ditemu.
Bala tuai patut ulih ngenipakka diri enggau polisi perintah kelimpah ari patut ibuh enggau meretika pekara ti benung nyadi dikena nentuka tiap langgur perintah ba tiap genturung pendiau tauka rumah panjai bisi kerejasama enggau mujur dipejalaika, ku iya.
"Laban kitai enggai ke semua langgur manah ari perintah ke dibai ngagau sesebuah rumah panjai tejanggal tauka diambi pulai ketegal ti enda disetuju peranak rumah panjai tauka rayat ti lalu meri pengerugi ngagai peranak nya empu dalam timpuh ti panjai.
"Nyadi tuai, kitai patut ulih lebih meri awakka diri kena nentuka langgur kitai mujur," ku iya.
Berebak enggau tu, iya madahka, KMKK nyadi tulang belakang sosio budaya, ekonomi enggau pengelantang raban bansa.
"Tanggung pengawa KMKK nyadi 'jematan' entara raban bansa enggau perintah dalam aspek bekunsi tauka meri penerang," ku iya seraya madah KMKK nyadi ikon tauka chunto ngagai peranak tauka rayat.
Nya alai, amat beguna sida KMKK meretika sejarah enggau latar belakang penumbuh KMKK, meretika tadbir urus enggau chara ngatur KMKK sereta nambahka penemu pasal tanggung pengawa KMKK.
Urung 50 iku orang ti nyengkaum tuai rumah enggau tuai raban bansa ari sitak DUN Bukit Begunan bisi nerima surat chiri nyadi tuai rumah ba pengerami nya.
Sama bisi datai, Pegawai Pelilih Menua Pantu Pantu Langgong Wasam sereta ti bukai.