KUCHING: Rayat Sarawak deka ke parti penyakal ti lurus enggau tulin, ukai parti ti ngemeranka 'dwistandard' tauka bechiping, ku Dato Sri Wong Soon Koh.
Mandal Presiden Kanan Parti Demokratik Progresif (PDP) nya madahka pekara nya maya mantah jaku Chairman Parti Tindakan Demokratik (DAP) Sarawak Chong Chieng Jen ngambika nyerenih enggau imbang ti efektif ngagai pemerintah nengeri ulih penyakal.
Wong, ti mega Kaban Kunsil Nengeri (ADUN) Bawang Assan, madahka tuai DAP Sarawak patut ngelengka semua pangkat dalam perintah besai enggau nengeri enti sida deka bejalaika tanggung pengawa penyakan ti meri asil.
"Kita enda tau bisi sepiak kaki dalam (perintah) enggau sepiak kaki di luar (penyakal). Nya deka nyadi dwistandard. Sereta orang ulih meda nya nyadi enda lurus.
"Bakani kitai ulih nerima pangkat dichirika perintah tang mantah perintah ti sama?," tanya Wong dalam siti penerang ensanus.
Wong nyebut pasal pangkat Kaban Parlimen Lanang Alice Lau (Sapit Speaker Parlimen), Kaban Parlimen Bandar Kuching Dr Kelvin Yii (Sekretari Politik Opis Menteri Pekara Pengereja Pengawa), Senator Roderick Wong enggau Chairman Lembaga Pelesenan Kenderaan Perdagangan Sarawak Michael Kong.
Chong sebedau tu madahka Wong, ti kala nyadi presiden Parti Sarawak Bersatu (PSB), ngaga kedalih lebuh minta DAP Sarawak nukar parti enggau begulai tauka nyadi parti penyakal aja ke penegap politik di nengeri nya.
DAP Sarawak iya nya sebagi ari Perintah Penyerakup tang parti penyakal ba renggat nengeri.
Chong madahka, kaban DAP Sarawak enda betukar parti enti semina ketegal penyenang.