Dikarang Rengenyan Labang
KUCHING: Chairman Gabungan Parti Sarawak (GPS) Datuk Patinggi Tan Sri Abang Johari Tun Openg madahka pengawa magi sitak Kunsil Nengeri (DUN) nyengkaum ti diarika sida ti kala nyadi pemesai Parti Sarawak Bersatu (PSB) deka dikerandau maya semak pengawa bepilih diatur.
Nya berindik ari, Hari Enam apin lama di Sibu, iya nya PSB udah dipadam sereta sida ti kala nyadi pemesai enggau kaban parti nya diterima sechara beraban ke dalam Parti Demokratik Progresif (PDP) siti ari parti komponen GPS.
Maya pengawa bepilih nengeri sebedau tu, bisi tiga sitak DUN dimenang PSB iya nya Bawang Assan (Dato Sri Wong Soon Koh), Engkilili (Dr Johnichal Rayong Nyipa) enggau Ba’Kelalan (Baru Bian).
Dalam GPS, DUN Bawang Assan enggau Engkilili iya nya dipenggi ngagai SUPP sereta Ba’ Kelalan diarika PDP.
“Nya ‘ok’. Kami deka berandauka pekara nya (pasal sitak) maya pengawa bepilih. Pengawa bepilih udah tentu ukai mega pagila. Kitai deka meda nama utai ke nyadi.
“Tambah mega semina dua aja. Ba’Kelalan iya nya PDP, tinggal Bawang Assan enggau Engkilili.
“Nama ti pemadu beguna sida ngaku nama ti digaga kitai. Tu beguna awakka serata Sarawak patut beserakup ari baruh siti aja,” ku iya.
Iya ditanya bekaul enggau sitak Kunsil Nengeri (DUN) ti dimenang sida PSB sebedau tu, ti diungkupka ngagai Parti Rakyat Bersatu Sarawak (SUPP) ti mega parti komponen GPS.
Abang Johari meri penerang nya maya dirandau raban pengarang berita bekaul enggau sida ti kala nyadi pemesai enggau kaban PSB masuk PDP, maya iya nerima pengabang ba hari keterubah Hari Raya Aidilfitri YAB Premier Sarawak ti diatur di BCCK ditu, sehari tu.
Dulu ari nya, Premier Sarawak nya madahka pemutus sida ti kala nyadi pemesai enggau kaban PSB ti masuk nyadi kaban PDP ngayanka sida iya ngaku polisi ke dipejalaika GPS.
Nitihka pemutuska ti udah digaga dua iku tuai parti nya, ku iya, PSB udah dipadamka lalu reti ia nadai agi entiti parti politik atas nama PSB.
“Bala kaban, Kaban Kunsil Nengeri, Yang Berhormat, sida begulai enggau penyukung ngaga pemutus masuk PDP.
“Nama ti pemadu beguna, PSB udah ngaku polisi GPS, laban maya pengawa bepilih sebedau tu, bekaul enggau polisi kitai. Baka ke ditemu nuan, dalam surat kabar sida mantah (polisi nya).
“Tang diatu sida patut ngaku iya nya GPS udah ngereja pengawa, sereta kami bisi kuing ti chukup nyata dipejalaika ungkup Sarawak,” ku.
Sama dalam komponen parti GPS iya nya Parti Pesaka Bumiputera Bersatu, Parti Rakyat Sarawak kelimpah ari PDP enggau SUPP.