MIRI: Isu salah guna dadah di Sarawak majak ngirauka berindik ari bisi betambah taun nyin kemari iya nya 10,365 kes dirikot dibandingka enggau bisi 9,092 kes taun 2022.
Yang Dipertua Dewan Negara Datuk Mutang Tagal madahka, penyampau rega dadah ti dirampas nya betambah ba taun 2023 iya nya sepenyampau lebih RM142 juta dibandingka lebih RM12 juta taun 2022.
"Enti di Miri aja, bisi 1,098 kes bekaul enggau dadah dirikotka ba taun 2023 dibandingka 852 kes ba taun 2022.
"Tu siti statistik ti ngirauka laban ba semua mengeri di Sarawak ngayanka (kes bekaul enggau salah guna dadah) betambah dalam beberapa taun sebedau tu," ku iya lebuh bejaku dalam Program Dialog Pemulihan Dadah dan Penyembuhan Rohani di Kenosis Sarawak ditu, Hari Enam.
Mutang madahka, ari statistik nya tebal agi sida ti tepuruk enggau salah guna dadah nya beumur entara 15 ngagai 39 taun.
Nya alai ku iya, raban bansa patut beratka pengawa mutarka penanggul dadah ti nyadi dalam komuniti sereta penumbuh Kenosis Sarawak tu bejalaika tanggung pengawa beguna dalam pengawa ngenyumanka salah guna dadah.
"Siti ari chara ti amat afektif kena mantu nagang penanggul dadah di menua kitai iya nya nengah pengawa ngambi bagi dalam aktiviti jalai pengarap.
"Tanggung pengawa jalai pengarap dalam pekara tu amat beguna, nya kebuh penumbuh Kenosis ti mantu dalam ngenyumanka tanda gian dadah nitihka ajar Kristian amat disukung.
"Kitai pechaya tanggung pengawa jalai pengarap bukai ke bisi di Malaysia mega amat beguna dalam pengeran kitai deka ngelaban penyalah salah guna dadah ti nyadi munsuh lumur satu menua ," ku iya.
Ba pengerami ti sama, Mutang mega bisi nyuaka pemeri sepenyampau RM5,000 ngagai Kenosis Sarawak.
Sama bisi datai Ahli Dewan Negara Senator Abun Sui Anyit, Sapit Presiden BEM Sarawak Dr Henry Padin, Chairman Kenosis Sarawak Dr Maurice Steve Utap enggau Manijar Pusat Kenosis Sarawak Pastor Robert Danor.