KOTA SAMARAHAN: Sarawak nyadi nengeri ti keterubah melanja projek perintah besai ngambika ulih dipejalaika enggau jampat.
Menteri Besai Datuk Seri Anwar Ibrahim madah, projek keterubah ari baru perintah besai iya nya ngaga Sepital Penyakit Riman Sarawak.
Nitih ku iya, pemutus tu udah ngelangkar sejarah Sarawak lebuh ti keterubah nyadi di Malaysia lalu nentuka perintah besai meri mayuh tanggungpengawa dulu ngambika dipejalaika perintah nengeri.
“Aku setuju lalu kitai mai chara baru ke alai Sarawak ulih mayar dulu lalu kitai di renggat perintah besai deka nampung pengudah nya.
“Nya alai, aku madahka kitai deka berengkah ngemunka pengawa ngaga enggau ngemansangka sepital tauka institut penyakit riman di Samarahan enggau naka pengelengkas,” ku iya.
Iya madah munyi tu lebuh bejaku ba Pengerami Berbuka Puasa MADANI 2024 di Masjid Al-Muttaqin, ditu kena Hari Enam.
Bejaku silik, Anwar madahka enti dibandingka enggau chara bejalaika sebedau tu, tu deka ngena timpuh kelimpah ungkus ti besai agi.
“Enda ngawa, kitai deka mantu sekeda pelin lalu ngemunka projek ke udah diputuska begulai enggau perintah nengeri sereta perintah besai.
“Nyema perintah nengeri ulih ngemunka projek, tu deka ngena ungkus ke baruh agi lalu ulih jampat dipejalaika,” ku iya.
Dulu ari nya, Anwar madahka Premier Sarawak Datuk Patinggi Tan Sri Abang Johari Tun Openg sama ngangkatka isu pelajar enggau pengerai lebuh aum ti dipejalaika ba Opis Opis Parit enggau Entali Ai (DID) Sarawak, kemari.
Ku iya, Abang Johari madahka perintah Sarawak sedia mayar dulu projek perintah besai ngambika ulih dipejalaika lalu tembu enggau lengkas.
“Projek besai ari baruh chara tu iya nya sekula ti deka digaga, ngaga klinik ba kandang menua pesisir sereta nyema kitai meda ungkus ngena chara biasa, tu deka mar agi lalu begunaka timpuh ke lama,” ku iya nerang.
Bekaul enggau pengawa ngaga sepital penyakit riman tu, Anwar madahka Abang Johari meri penerang bisi kena empas enggau penanggul penyakit riman ti nyadi di Sarawak.
“Premier ngasaika penanggul penyakit riman ke alai ungkus ti mar berubat lalu bisi ti ke Kuala Lumpur deka berubat.
“Nya alai iya (Abang Johari) ngemeratka guna tu kenyau ari suba. Tang, menua bisi penanggul teknikal enggau pekara wang ti ditapi,” ku Menteri Pekara Wang tu nambah.
Dalam pengerami ti sama, Anwar udah nyuaka pemeri ngagai 150 raban orang seranta di bagi menua Kushing, Samarahan enggau Serian.
Sama bisi maya pengerami tu iya nya Premier Sarawak Datuk Patinggi Tan Sri Abang Johari Tun Openg, Sapit Menteri Besai Dato Sri Fadillah Yusof, menteri perintah besai enggau nengeri, Ketuai Sekretari Menua Tan Sri Mohd Zuki Ali enggau temuai dipebasa ke bukai.