BINTANGOR: Bisi RM24,188 geran khas udah mujur diagihka ngagai bala penerima geran tu ba sitak Kunsil Nengeri (DUN) Meradong.
Kaban Kunsil Nengeri (ADUN) Meradong Datuk Ding Kuong Hiing madahka bisi tujuh buah organisasyen perintah enggau ukai dikuasa perintah (NGO) ti mungkur Gerempung Apai Indai enggau Pengajar (PIBG) udah nerima geran tu.
"Pengawa tu iya nya sebagi ari asil ari agih belanja ke diberi perintah Sarawak dalam mantu gerempung enggau organisasyen tu dalam ngatur program sereta ngangkatmanah prasarana enggau nangkup guna ninting maya dalam ngatur aktiviti begulai enggau kaban dalam organisasyen tu.
"Kitai ngarapka raban NGO ngena memanah geran ti diterima lalu nguna nitihka baka ti udah dipesetuju begulai enggau kaban dalam organisasyen tu.
"Kitai patut ingat iya nya geran ke diagihka tu ungkup tuju pemansang kandang endur diri empu sereta guna begulai lalu ukai nya ungkup guna kediri aja," ku Ding.
Iya madah munyi tu ba pengerami nyuaka geran khas DUN Meradong ba Palan Servis DUN Meradong, kemari.
Nitih ku Ding, iya deka terus nyukung pemansang komuniti menua pesisir dalam mayuh macham projek enggau inisiatif dalam ngangkatka pengelantang peranak di menua nya.
"Perintah seruran ngemeratka dalam pengawa bejalaika projek pemansang ti ulih meri pemaik ngagai tetiap raban komuniti.
"Kitai ngarapka tetiap agih belanja ti diberi tu ulih dikena memanah.
"Pengeransing tu mega ngayanka perintah bebendar mantu rayat enda ngira dini endur kita," ku iya nambah.