Bagi menua Sri Aman ditetapka nyadi kandang bagi menua dirampit rabies baru kena 25 Mac laban bisi positif rabies jelu baru ditemu
KUCHING: Bagi menua Sri Aman udah ditetapka nyadi kandang bagi menua dirampit rabies baru di nengeri tu, ku Sapit Premier Sarawak Datuk Amar Douglas Uggah Embas.
Chairman Komiti Penyangga Penusah Ngenyit Nengeri Sarawak (JPBNS) nya madahka, pekara nya udah dipadahka Menteri Industri Pemakai, Komoditi enggau Pemansang Wilayah kena 25 Mac berindik ari bisi positif rabies jelu baru ditemu ba bagi menua nya apin lama.
"Bagi menua Sri Aman udah ditetapka nyadi bagi menua dirampit Rabies. Sebedau tu bagi menua Kuching, Samarahan, Serian enggau Bintulu udah dulu ditetapka kandang bagi menua dirampit rabies.
"Bisi 29 kandang endur agi ditetap nyadi Kandang Endur Dirampit Rabies taja pan nadai udah jelu positif rabies ditemu ba kandang endur nya ba taun 2024," ku iya.
Iya madahka pekara nya nengah penerang iya nyerumba bejadi pengerami nutup Bengkel Pemantapan Pelan Tindakan Membanteras Rabies 2024 diatur Opis Servis Veterinar Sarawak (JPVS) ti digulu direktor iya, Datu Dr Adrian Susin Ambud ditu, kemari.
Nitihka Uggah pengawa netapka kandang endur tauka bagi menua dirampit rabies amat patut dikena nentuka ejensi ti bekaul bejalaika pengawa munaska rabies ba bagi menua ti tekeruga.
Ku iya, nyentuk seharitu, penyampau semua pemati iya nya 71 ari 78 kes rabies ba mensia kenyau igi penyakit nya ditetapka di Sarawak ba bulan Julai 2017.
Iya madahka, taun tu aja bisi 45 jelu ari 174 sampel udah diuji positif rabies enggau jelu rabies positif ditemu di Kuching bisi 17; Bau(4); Lundu (2); Padawan (7); Samarahan (4); Serian (3); Tebedu (1); Sri Aman (1); Bintulu (3); Sebauh (3).
Ku iya, ba bulan Mac aja, bisi 20 kes jelu positif rabies ditemu nyengkaum di Bintulu, Kuching, Bau, Sri Aman, Padawan, Samarahan enggau Serian.
Kelimpah ari nya, bekaul enggau program vaksin anti rabies jelu, Uggah madahka, taun nyin kemari semina 44,874 iku ukui udah divaksin JPVS enggau Pasukan Immune Belt Enforcement Team (IBET) di serata Sarawak.
"Ia agi kelalu jauh ari tagit 70 peratus ari anggar 230,000 iku ukui di nengeri tu.
"Kena nyapai enggau ngetanka 70 peratus imuniti raban, woksyop seharitu (kemari) meri sadang penemu numbuhka 14 Pasukan Bergerak Veterinar (VMT) enggau 12 Pasukan Penguatkuasa,” ku iya.
Uggah madahka bisi 133 pengawa puang baru deka ditumbuhka ari baruh JPVS ti deka ngenyakahka agi program vaksinasyen anti-rabies di serata Sarawak.
"Atur tauka undang-undang ti diteritka ngagai ukui ti enda divaksin, nagang ukui lelang ti ditagit enggau lisin deka dipejalaika enggau lengkas ulih raban penerit adat (DVS, PDRM enggau IBET) begulai enggau opis perintah lokal ba kandang endur nya empu di serata nengeri kena ngurangka pemayuh populasyen tesat enggau akses vaksinasyen," ku iya.
Kelimpah ari nya, ngenang pasal woksyop nya, ku iya, bisi 13 ejensi ngambi bagi dalam woksyop pengelama dua hari Pelan Tindakan Kawalan dan Pembasmian Rabies 2024-2025.
Nengah woksyop nya, Uggah madahka beberapa strategi udah dilangkar nyengkaum 'Memperkasakan Pemvaksinan dan Pengawasan'; 'Pengurusan Populasi Anjing' (kena nyapai sifar ukui lelang enggau jemu jelu tupi direjista lisin, vaksin enggau ti bukai); 'Undang-Undang Penguatkusaan' (kena neritaka Ordinan Kesihatan Awam Veterinar dan Pelesenan Anjing); enggau 'Peningkatan Sumber Tenaga' (numbuhka Pasukan Bergerak Veterinar enggau raban penerit adat).
"Perintah GPS chukup beratka pasal pengidup enggau pengelantang rayat Sarawak. Kitai patut neritka undang-undang ke udah bisi kena nyaga rayat Sarawak.
"Reti ia operasyen ti dilanggur kitai deka lebih fokus sereta aku ngarapka semua orang enggau individu deka bejalaika tanggung pengawa ti manah kena munaska Rabies di Sarawak," ku iya.