STEM ba renggat tinggi dikena nentuka penegap enggau penambah pengawa beranakka puku
KUALA LUMPUR: Perintah deka terus fokus ngagai latih dalam bidang Sains, Teknologi, Injiniring enggau Matematik (STEM) kelebih agi ba renggat tinggi dikena nentuka penegap enggau penambah pengawa beranakka puku ari luar ke menua tu.
Menteri Besai Datuk Seri Anwar Ibrahim madahka pengelemi menua diatu iya nya latih dalam pelajar matematik, sains, injiniring, pemintar artifisyel (AI) enggau Pelajar Teknikal enggau Latih Vokasional (TVET) ba renggat tinggi.
"Kitai ulih ngereja tu enti kitai fokus sereta ngungkupka belanja tambah (ngagai latih dalam bidang STEM)," ku iya masa Sesi Tanya Saut Menteri di Dewan Rakyat, kemari.
Iya nerangka pekara nya lebuh nyaut tanya tambah ari Jimmy Puah Wee Tse (PH-Tebrau) ti deka nemu chara perintah nentuka momentum pengawa beranakka puku ke diulih taun nyin kemari iya nya sepenyampau RM329.5 bilion terus nambah ba taun ti deka datai.
Kelimpah ari nya Anwar ti mega Menteri Pekara Wang ngaku, iya nya raban nembiak ti rinduka STEM mega kusut sereta pekara nya chukup ngirauka.
Taja pia Anwar madahka Opis Menteri Pelajar sereta sekeda raban pelajar ti bukai udah bejalaika mayuh chara kena ngansak apai indai ngambika meransang anak sida ngambi pelajar STEM ba renggat sekula sekondari.
"Tu benung chakah dipejalaika," ku iya.
Anwar madahka, kelimpah ari nya, maya betemu enggau kompeni ari luar ti bisi ati deka meranakka puku di Malaysia, iya seruran ngemeratka pemesai guna numbuhka palan lati bekaul enggau kompeni nya di menua tu ti nyendiaka latih pengelandik ngagai raban profesional sereta nembiak menua tu.
"Mesti bisi latih ditu laban kitai endang benung suntuk injinir. Taja pan kitai bisi injinir ti manah sereta ulih diterima, (tang) agi dianggap bisi pengurang ba renggat tinggi, (ari sukut) pengelandik renggat tinggi.
"Bisi bida pasal niche (bidang) ti diguna. Nya alai fokus ngagai TVET enggau injiniring tu (patut) dikemerat... Enti Malaysia enda ngereja enggau lengkas, ti segaut, kitai deka rugi.
"Laban pekara ti difokus diatu ukai agi low-end industry tang high-end industry ti begunaka penyakah ti lebih tinggi ari ti udah bisi diatu," ku iya.
Ku Menteri Besai nya, iya udah minta universiti numbuhka Fakulti AI, berengkah enggau Universiti Teknologi Malaysia (UTM), ti patut nyeraris aktiviti sida enggau semua universiti ti bisi AI kena napi sekeda peminta guna bidang nya. -BERNAMA