KUCHING: Sapit Premier Sarawak Datuk Amar Douglas Uggah Embas minta semua pegawai ari opis enggau ejensi ti dipegai Opis Menteri Infrastruktur enggau Pemansang Penyangkai Kapal (MIPD) nyemetak madahka penanggul ke nyadi ba projek ke benung digaga.
Uggah ti nyadi Menteri MIPD madahka, penanggul ke nyadi ba taba projek patut dipadah enggau terus terang ngagai iya empu tauka raban pengatur tinggi
"Anang ngelalaika berita enda manah.
"Padah ngagai kami kelebih agi penanggul ke bisi nyadi,(baka) maya meri penerang bekaul enggau projek nya ngagai kami. Engkah atas mija ngambika (penanggul nya) dikerandau lalu diputarka," ku iya.
Iya madahka pekara nya pengudah randau integriti ti dibantaika Ustaz Syamsul Debat ngagai pegawai enggau staf MIPD sereta ditangkan enggau program bebuka puasa diatur ba BCCK ditu, ensanus.
Ngenang kes maya ngabas projek jalai raya di Bagi Menua Samarahan apin lama, Uggah madahka, seraban tuai enggau pengempu tanah ba kandang endur nya datai enggau pengirau pasal pampas tanah sida ti kena keruga.
Ku iya, udah tentu sida nya bisi ringat.
"Tang maya ti meri penerang dulu ari nya ngagai aku, aku nadai dipadahka isu tu sekalika enggau sengaja tauka penyilap ti asal. Tang aku ngarapka nya siti penyilap asal.
"Aku empu, dua sapit aku enggau sekretari mendam, kami semua tebuka runding mendingka timbal ari kita. Enda ngira sekalika nya berita manah tauka jai, nuan patut madah ngagai kami," ku iya.
Bekaul enggau randau integriti, Uggah madahka amat beguna semua orang terus gawa enggau ngemeran sereta ngemeratka integriti.
"Dalam industri pemansang penyangkai kapal enggau kereja raya, integriti tu lebih ari ukai semina pengelurus.
"Integriti iya nya komitmen ngereja pengawa enggau nyulut, likun sereta ulih dipechaya. Enti dipekat pekara enda manah ulih nyadi, struktur enda mujur, undang-undang enggau pemanah nama mega tekeruga," ku iya.
Kelimpah ari nya, sekali agi Uggah ngingatka MIPD udah netapka sekeda tagit ke patut dijapai taun tu, iya nya nyengkaum teulihka 100 peratus tauka ambis nadai 95 peratus belanja pemansang.
Nitihka iya, taun 2024 MIPD diungkupka belanja RM799.5 juta belanja pemansang.
Ba taun 2021, ku iya, prestasi belanja pemansang MIPD iya nya 67.46 peratus, enggau ba taun 2022 bisi tinggi mimit iya nya 68.16 peratus.
"Aku chukup temegah ati madahka ba taun 2023, prestasi (belanja pemansang) kitai ba tikas 85.69 peratus, entara ti pemadu tinggi dibandingka enggau opis menteri sereta opis bukai.
"Sereta aku arap bendar kitai ulih ngereja enggau manah agi," ku iya seraya madahka sifar projek sakit mega tagit MIPD.
Sama bisi datai, Sapit Menteri iya, Datuk Ir Aidel Lariwoo; Seretari Mendam MIPD, Datu Chiew Chee Yau; Sekretari Politik ngagai Premier Sarawak, Roseline Mapong; enggau pengari ari Opis Kereja Raya (JKR), sereta Autoriti Penyangkai Kapal Kuching, Rajang, Tanjung Manis enggau Samalaju.