SIBU: Raban bansa ti segempung amat beguna dikena nentuka Sarawak ulih terus nyingkang nuju nyapai status nengeri maju enggau bepenatai pemisi tinggi maya manggai 2030.
Sapit Menteri Pengerai Mensia Mayuh, Pengawa Berumah enggau Perintah Lokal, Datuk Michael Tiang madahka, nuju satus nya deka betapi mayuh penyemekih, nya kebuah amat beguna tiap pengawa dagang ngerembai maju enggau meri asil ngagai ekonomi nengeri.
"Tang dalam kitai benung besemekih tu, nengeri kitai mega patut bisi raban bansa ti ulih bekerejasama sereta meri penemu tauka idea baru enggau ngemajuka nengeri lebih jauh agi.
"Raban bansa ti bisi pengibuh enggau nyukung pangan diri ulih ngerembai maju. Semina ngena chara tu, kitai ulih nempa raban bansa ti segempung tauka dalam pemaik," ku iya maya bejaku bejadika seminar nyerumba Sambutan Hari Kerja Sosial Sedunia 2024 di Institut Methodist Pilley (MPI) ditu, kemari.
Tiang ti mega Kaban Kunsil Nengeri (ADUN) Pelawan madahka, perintah udah bejalaika mayuh projek pemansang, inisiatif enggau polisi kena nyapai status menua maju enggau bepenatai pemisi tinggi.
"Kitai mayuh bejaku pasal ekonomi digital enggau ekonomi gadung. Dua pekara tu amat beguna ukai semina nyungkak Sarawak ke mua tang mega dikena nentuka Sarawak bisi dudi hari ti meruan," terang iya.
Ngenang pengerami Hari Kerja Sosial Sedunia, Tiang madahka pengerami nya dikena masa enggau kelai terima kasih ke pemagas, komitmen ti nadai bebida ngagai pengelurus rama enggau dedikasyen pekereja rama dikena ngangkatka pengidup individu enggau komuniti.
"Pekereja rama baka hero raban bansa ti enda ditusui, suah gawa dibelakang mantu raban ti kurang dalam raban bansa kitai.
"Sida pengari kediri empu ti enda ulih ngari tauka ngetanka diri empu, negika penyama rata enggau hak mensia, sereta tiang sukung sida ti begunaka bantu.
"Dalam dunya mayuh penguji, ari penyeranta enggau enda sama rata ngagai krisis pengerai runding enggau penusah rampa menua, tanggung pengawa pekereja rama amat beguna.
"Sida tu orang ke dimua, ngembuan penyinu enggau meri bantu praktikal ngagai orang ti betapi penusah," terang iya.
Tiang madahka, pekereja rama engka enda tebilang baka orang ti pandai sereta landik ba perubat, lutur tauka pematu perubat, tang pengawa sida enda ulih dikumbai lempung laban meri empas positif ngagai raban bansa.
"Pekereja rama nyadi penyungkak ba ubah sistematik, ngelaban polisi ti enda adil enggau nyukung pekara baru kena betapi kebuah enda adil dalam rama.
"Sida ejen penegap, mantu individu enggau komuniti ngamatka potensyel penuh sida enggau nempa menua dudi hari ti lebih meruan.
"Maya kitai nyambut Hari Kerja Sosial Sedunia, aram kitai ukai semina ngapu penyulut pekereja rama tu, tang mega patut ngaku komitmen kitai nyukung asil pengawa sida.
"Aram kitai bediri tegap enggau sida maya sida terus bebendar nempa dunya iya nya tiap iku orang sama dipebasa enggau dikesinu," ku iya.
Bisi empat pengelicha iya nya Dr Teoh Ai Hua, Chew Siok Cheng, Dr Dolly Paul Carlo enggau Dr Ling How Kee dikangau ngemujurka semina nya ti digulu 50 iku pesereta.
Sama bisi datai Tuai Pegawai Eksekutif MPI Hii King Kai enggau Kapitan Soo Teck Kee.