BINTULU: Kualiti ngaga gula apong ari pun apong patut dijaga dikena ngetanka penyulin enggau nentuka tikas pemanis ngambika produk tu terus diterima mensia mayuh.
Pengawa nanam pun apong megau ulih digaga begulai enggau utai tanam bukai dikena ngangkatka penatai pemisi ekonomi komuniti di kandang menua tu kelebih agi di Pusa, Betong di nengeri tu ti nyadi pengeluar besai gula apong di menua tu.
Pengawa ngaga gula apong mega patut diangkat lalu ditambah manah enggau mayuh macham produk bukai ti bisi potensial.
Berindik ari tu, empat raban akademik Jabatan Sains Tanaman, Fakulti Sains Pertanian dan Perhutanan Universiti Putra Malaysia Kampus Bintulu (UPMKB) bejalaika 'Projek Putra@Pusa: Transformasi Sosioekonomi dan Pembangunan Produk Pertanian Nipah Komuniti Usahawan Pusa Sarawak (Siri 1)', bedau lama ti udah.
Projek ti dipenyadi Pemesai Pelilih Menua Betong Jamain Wahab tu udah disereta 20 iku orang dagang gula apong Pusa ti bisi peluang ninga licha bekunsi penemu enggau topik 'Pengendalian Lepastuai Gula Nipah' ari raban akademik iya nya Dr Nuratika Tamimi Sheikh Mohamed di Palan Internet Komuniti Palan Ekonomi Digital (PEDi) Pusa kena 7 Mac 2024 nyin tadi.
Dr Nuratika madah, pengawa netapka Prosedur Operasyen Standard (SOP) tu endang beguna dalam nyamin tikas kualiti gula apong berindik ari gula apong Sarawak tu udah mujur dieksport ke menua Eropah, Timur tengah, Korea Selatan enggau Jipun.
"Tu ngayanka gula apong Sarawak ngembuan potensial dalam nentuka penambah penatai pemisi ekonomi Sarawak enggau menua kelebih agi," ku iya.
Ku iya mega nambah, chukup beguna dalam nyaga kualiti pengawa ngasilka gula apong tu dikena ngetanka pemanah nya ngambika terus diterima mensia mayuh lalu mega teknik netapka pemanis gula apong tu sama patut dikemeratka.
Ku iya madah, pengawa nanam pun apong mega ulih disegulaika enggau utai tanam bukai dikena ngangkatka penatai pemisi ekonomi komuniti di kandang menua tu.
Beserimbai enggau tu, Jamain mega madahka, pengawa bekunsi penemu ti dibai raban akademik UPMKB tu nyadi kelai ti manah enggau pengarap program tu ulih diteruska jemah ila dalam meri penemu betanam apong, rumbia enggau nanas ungkup semua renggat peranak ti ngaul orang lunggar umur enggau mega nembiak.
Ku iya, industri apong ti dikerembaika tu mega muka mayuh agi peluang gawa ungkup raban nembiak sereta status ekonomi komuniti di Pusa.
Ba program ti sama siku agi raban akademik UPMKB Dr Franklin Ragai Kundat udah bekunsika chara ngaga sistem hidroponik digaga diri empu (DIY) enggau chara nanam hidroponik ungkup sekeda bansa sayur baka salad, bayam, sawi enggau ke bukai.
Bejaku bekaul enggau chara tu, Chairman Koperasi Kariah Masjid Darul U'lum Kalok Betong Berhad Juhlie@Joblee Ramli madah, ketegal ti kurang sayur di Pusa, bekunsika penemu bakani nanam ngena chara hidroponik tu endang besai reti ungkup peranak di kandang menua tu nanam kediri sayur ba kandang endur ke udah bisi.
Asil bejalaika pengawa manah projek keterubah tu, projek siri kedua licha deka diatur dalam timpuh ti enda lama agi bekaul Bakani Ngasilka Produk Buah Apong ari Dr Shiamala Devi Ramaiya enggau Pengawa Ngasilka Prosduk Bepelasark GUla Apong ari Ketuai projek Dr Hanisah Kamilah Abd Razak.