SRI AMAN: Bisi 15 buah kelab lumba enggau main sereta rekreasyen, gerempung pengintu pengelantang pendiau enggau komiti pengatur program ari luar sitak Kunsil Nengeri (DUN) Balai Ringin udah nerima geran bantu ari perintah.
Bantu tu disuaka Sapit Menteri Dagang Temuai, Industri Kreatif enggau Seni Pemerindang ti mega ADUN Balai Ringin Datuk Snowdan Lawan di opis iya di Kuching.
Snowdan madah, kelab enggau gerempung sereta komiti pengatur program tu iya nya ari sekeda bagi menua di Sarawak baka ari Miri, Pakan, Sri Aman, Baleh, Ngemah, Tamin, Sarikei, Meluan enggau Krian.
Ku iya, penyampau semua geran projek mit menua pesisir (MRP) tu iya nya RM123,000.
“Aku ngarapka penerima geran tu ulih ngena memanah sekalika ungkup bejalaika pengawa pemansang tauka ngatur aktiviti ba sitak diri empu,” ku iya madah.