Nama ti dikedeka Sarawak iya nya hak aja ti udah majak lenyau lalu ukai nya hak orang bukai
KUCHING: Premier Sarawak Datuk Patinggi Tan Sri Abang Johari Tun Openg madahka rambai jaku 'Utamakan Sarawak' (Kemeratka Sarawak) ukai reti nya deka mambarka ari perintah besai.
Ku Abang Johari nyemetak madahka nama ti dikedeka Sarawak iya nya hak aja ti udah majak lenyau lalu ukai nya hak orang bukai.
“Kitai ngemansangka Sarawak enggau manah lalu tu deka nentuka sebuah menua Malaysia ti tegap.
“Nya alai aku madah nyema Sarawak tegap, Malaysia mega tegap lalu baka nya mega nyema enda. Sema ke jaku kitai charut tauka pambar, kita ngasaika Perintah Penyerakup deka bisi?,” ku iya.
Iya madah munyi tu lebuh 'Sesi Townhall 7 Tahun Bersama YAB Premier Sarawak', kena malam Hari Enam.
Sesi tu udah didiatur Sayed Munawar Sayed Mustar begulai enggau dua iku agi moderator, Profesor Datuk Dr Siva Pandian enggau Mona Abdul Manap.
Ku Abang Johari agi, nama ti diguna diatu iya nya menua ti tegap lalu kebuah tu iya begulai enggau kaban bukai dalam Gabungan Parti Sarawak (GPS) nyukung perintah ti bisi diatu.
“Lebuh aku nyebut 'Utamakan Sarawak', ukai reti nya kitai deka mambarka perintah besai.
“Nama ti dikedeka kitai iya nya hak kitai ti udah dirampas lalu ukai nya hak orang bukai.
“Nya alai aku beterima kasih ngagai semua ketuai GPS laban ti udah segulai sejalai lalu ngemansangka Sarawak enggau perintah besai,” ku iya