KUCHING: Opis Menteri Pelajar, Inovesyen enggau Pemansang Penau (MEITD) ba taun 2023 netapka juluk lebih 3,000 iku penyereta Space Apps Sarawak ti nyengkaum nembiak sekula sekondari di menua pesisir enggau universiti di nengeri tu.
Sapit Menteri iya, Datuk Francis Harden Hollis madahka, kenyau beberapa taun Space Apps Sarawak dipejalaika udah mujur meri inspiresyen ngagai lebih 2,500 iku penyereta ti beumur 13 taun ke atas.
“Taun tu, opis menteri aku nagit deka meri empas ngagai 3,000 iku penyereta tambah, sereta nyikap sida tu ngambika nyadi orang ti ulih ngatur pengawa tauka ngemujurka penanggul jemah ila ngena chara sains Bumi dan Angkasa Lepas NASA.
“Kena nyapai juluk tu, tim kami udah merambu deka nemuai ngagai 50 buah sekula ba serata Sarawak, ti nyengkaum ba Bau, Mukah, Sarikei, Sri Aman, Saratok, Baram enggau mayuh agi sekula bukai. Taun tu sekula ba menua pesisir mega deka disengkaum.
“Ba tiap sekula alai nemuai nya deka diberikelala tauka penerang bekaul enggau Cabaran NASA Space Apps, penemu pasal Teleskop Angkasa James Web, enggau nembiak deka diberi awak ngambi bagi dalam aktiviti praktikal baka ngelipat keretas enggau origami,” ku iya.
Harden madahka pekara nya lebuh dikerandau raban pengarang berita pengudah iya bejadi NASA Space Apps Sarawak ke-3 ti diatur ba Universiti Swinburne ditu, kemari.
“Lalu penemuai (ngagai 50 buah sekula) nya deka meri nembiak peluang ngepunka pejalai NASA Space Apps Sarawak ti bisi nyendiaka ganjaran enggau perais ti manah,” ku iya seraya madahka sida bisi timpuh sebulan, ti berengkah ari kemari kena nyapai juluk matak 3,000 iku penyereta Space Apps Sarawak.
Bejaku ba pengerami nya, iya madahka rambai jaku NASA Space Apps Sarawak taun tu ‘Explore Open Science Together’, ngelakuka chara saintifik kolaboratif ti ulih meransang penyereta, pengawa bekunsi penemu enggau impalk global.
Harden madahka Pekara Pemun ti Besai NASA Space Apps iya nya inklusiviti laban raban pakar ari mayuh bengkah bidang baka teknologi, saintis, pereka, orang dagang enggau pencherita deka betapi enggau penguji ti deka datai.
“Opis menteri kami (MEITD) nyukung pengawa tu kena ngangkatka pengelandik dalam mutarka penanggul. Ba pun taun tu, opis menteri mega bisi melanja Tim Change Maker SMK Bintulu ti udah diaku nyadi pemenang global dalam Cabaran NASA Apps 2021, nemuai ngagai indu opis NASA di Washington DC.
“Tu kena meri inspirasyen ngagai lebih mayuh orang ti bisi penau nempa ubah ti deka meri empas enggau impak ngagai komuniti sida.
“Sehari tu kelai ngepunka pejalai NASA Space Apps Sarawak 2023 kami, ti nyemayaka siti siri aktiviti, bengkel enggau iring dikena ngenegapka penau peranak menua tu awakka ulih nyapai juluk ati sida,” ku iya.
Sama bisi datai ba pengerami tu kemari Ketuai Pemesai Eksekutif Sarawak Digital Economic Corporation (SDEC) Ir. Professional Technologist (Ts) Sudarnoto Osman; Realfun Academy and NASA Space Apps Local Lead, Teo Yuang Teck enggau sida ti bukai enggau bala nembiak ari Yayasan Sarawak International Secondary School, Lodge Secondary School enggau Kolej Universiti i-CATS.