Berindik ari pekara nya perintah menua kitai ngena chara sereta ngemeratka ekosistem ti chukup, ku Abang Johari
Dikarang Rengenyan Labang
KUCHING: Premier Sarawak Datuk Patinggi Tan Sri Abang Johari bepenemu pengawa nyaga pengerai siti agi bidang ti begunaka energi gadung.
Berindik ari pekara nya, perintah menua kitai ngena chara sereta ngemeratka ekosistem ti chukup lalu nengeri tu patut ngelatih mayuh agi orang laban begunaka orang ke tau nyaga kereban, ngaduka pemanah proses sereta begunaka orang ti inovatif kena ngemanahka semua ekosistem dalam teknologi gadung, ku iya.
Enti semua ekosistem teknologi gadung udah mujur dipejalaika ku iya, pengawa nyaga pengerai mega deka nyadi teknologi gadung laban sepital mega deka ngemeratka energi gadung, lalu Sarawak dalam bidang nyaga pengerai ulih nyendiaka servis gadung.
“Nama pekara ti deka dipadah aku ditu, pengawa nyaga pengerai iya nya siti agi bidang ti begunaka energi gadung. Servis nyaga pengerai kitai mega patut bisi chara baru enggau ‘siruka rampa menua’ sereta endang patut servis ba sepital kitai ngena teknologi ti meruan.
“Semua ekosistem kitai udah bisi, semina kitai dekaka perintah besai numbuhka undang-undang, lalu undang-undang ke udah bisi patut dikemaru setipak enggau ubah ti benung nyadi diatu.
“Aku udah berunding enggau Menteri Besai (PM) (pasal undang-undang), Ambika banding dagang karbon, kitai patut ngemaruka undang-undang kitai ti bekaul enggau dagang karbon laban karbon tu siti ari komoditi sereta nyadi dagang antarabansa, nya alai kitai patut bisi undang-undang dalam langkar kereja bakani kitai ngaduka karbon,” ku iya.
Iya madahka pekara nya maya aum pengarang berita pengudah bejadi Simposium Energi Gadung enggau Pemansang Sarawak 2023 (GESS) & Solar Testbed, ti diatur ba Palan Penyulut Teknologi Sarawak (CENTEXS), Jalai Sultan Tengah kemari.
Bejaku baru, iya madahka Sarawak bisi potensial besai nuju ekonomi hidrogen berindik ari ti ngembuan jalai pemansut baka hidrogen lalu nengeri tu ulih nyapai pekara ti ditaga lebuh manggai ba taun 2030.
Nya alai menua kitai ku iya, begunaka orang ke bisi pengelandik miki ngemanah sereta bepenemu dalam teknologi ti bekaul enggau ngasilka hidrogen lalu nengah chara tu ulih meransang mensia mayuh sama ngambi bagi dalam aktiviti ekonomi.
“Menteri Besai (PM) suah madahka kitai Sarawak udah dulu nyingkang ke mua. Reti nya kitai bisi kerejasama enggau perintah besai ambika sida meda ekosistem nyengkaum undang-undang awakka langkar undang-undang kitai ulih dikena ngaduka ekonomi baru.
“Reti nya ditu, undang-undang kitai patut dikemaru ba renggat perintah besai. Maya bejaku ba konvensyen penyerakup, aku bebendar madahka menua kitai Malaysia patut nuju ngagai ekonomi baru ambila ulih besemekih enggau menua bukai kelebih agi menua luar. Kitai bisi jalai pemansut, semua pemansang bakat (kurang),” ku iya.
Sama ngulu program nya kemari, Sapit Premier Sarawak, Dato Sri Dr Sim Kui Hian; Sapit Menteri Pelajar, Inovesyen enggau Pemansang Bakat Datuk Francis Harden Hollis, Menteri Utiliti enggau Telekomunikesyen Datuk Julaihi Narawi, Chairman CENTEXS Tan Sri Datuk Amar Mohamad Morshidi Abdul Ghani, Ketuai Pemesai Eksekutif CENTEXS Syeed Mohd Hussien Wan Abdul Rahman enggau sida ke bukai.