SIBU: Mensia mayuh dilalau ngambika seruran bejejaga sereta ngemeratka pengelikun enggau pengelantang diri berindik ari gaya mua hari diatu ti enda tentu.
Ketuai Polis Pelilih Menua Sibu ACP Zulkipli Suhaili madah, mengeri tu ngerikodka tikas pengangat ninting hari entara 35 nyentuk 37 darjah Celsius ambis nadai dalam tiga hari berunggu di mengeri tu.
"Pia mega enggau kabut ti suah nyadi maya lemai hari, anang kitai enda ibuhka tu.
"Dalam kitai berami ngintu pengerami tu, anang kitai enda ingatka pengelikun enggau pengelantang kitai. Dalam gaya Sibu diatu enggau gaya mua hari ti enda tentu, aku minta ngambika kitai semua seruran bejejaga," ku iya madah maya Pengerami Ngintu Raya, Gawai enggau Kaamatan ba Indu Opis Polis Pelilih Menua (IPD) Sibu bedau lama ti udah.
Ku iya, mensia mayuh dilalau ngurangka aktiviti luar ti kena panchar mata panas laban gaya hari ti panas tu ulih ngasuh lelak lalu ke balat agi tau kena 'strok haba'.
Zulkipli madah, pengerami tu nyadika pelasar ti paling efektif ungkup raban polis ngerapitka kaul lalu bekelala enggau komuniti di menua tu.
"Pengerami program tu mega kebendar nya manifestasi penyerakup komuniti ti ngiga pekara ti sama dalam mayuh bida.
"Kebendar nya, pengulih kitai dalam nampung enggau bebasaka mayuh pekara dalam komuniti sereta penyerakup kaul kitai tu mih kunchi ti nyadi pemun pengelantang komuniti madani," ku iya nerang.
Pengerami tu udah digulu semua raban enggau etnik di Sibu baka Melayu, China, India, Melanau, Bidayuh, Kadazan Dusun enggau ke bukai ti lalu ngayanka pengelantang pengidup pupu bansa di mengeri tu.