JULAU: Dua ripot kes tanah tusur ti ngaul peranak ari dua buah rumah panjai udah diterima raban Bomba ari Balai Bomba enggau Penyelamat Bintangor, kilah ensana.
Ripot keterubah diterima ari peranak Rumah Regina, Batu 13, Jalai Engkamop, Pakan lalu siti agi ripot ari peranak Rumah Karon, Gerugu Sengaih, Julau.
Ketuai Bali Bomba enggau Penyelamat (BBP) Bintangor Nicholas Belulin madahka Bomba nerima kangau ngenyit bekaul penusah tu ari peranak rumah panjai nya urung pukul 8:45 pagi.
“Pengudah nerima kangau ngenyit tu, dua iku raban Bomba udah datai ke palan penusah nyadi ti keterubah iya nya Rumah Regina ti penyauh 83 kilometer ari balai bomba.
“Lebuh datai di rumah panjai tu, raban Bomba terus meresa enggau matau gaya ti nyadi tanah tusur ba rumah panjai tu,” ku iya ditu kilah ensana.
Nitih ku iya, asil pengawa matau Bomba meratika tanah tusur tu nyadi ba bilik lumur 3, 4, enggau 5 ke alai tu ngujungka pengerusak ba bilik mandi enggau agu rumah nya.
Ku iya, bepelasarka gaya tu, raban Bomba ngelalau peranak ngambika bejejaga laban struktur tanah di palan penusah tu nyadi enda tentu tegap lalu bisi risiko tusur baru nyema bisi ujan bangat baru nyadi.
“Pia mega, raban Bomba udah masang tali ngelai palan penusah nyadi ke lalau sereta madah nya enda likun.
“Penusah di /rumah Karon, Gerugu Sengaih, Julau dipeda raban Bomba dua pintu bilik udah tekeruga laban tanah tusur di palan nya,” ku iya nerang.
Berindik ari tu, penusah ngenyit tu ngujungka pengerusak muakka dapur rumah sida ti tasah lalu Bomba ngelalau peranak di rumah panjai tu seruran bejejaga laban tanah tusur nyangka deka nyadi agi berindik ari tanah ti enda tentu tegap.
Tali kelai udah diengkah ba palan penusah nyadi lalu peranak dipinta ngambika ngeripot enggau lengkas ngagai Bomba nyema bisi tanah tusur nyadi di palan nya.
Asil ari penerang peranak kededua rumah panjai tu, kes penusah ngenyit tanah tusur tu nyadi kena 9 Mac nyin tadi (Hari Empat).