KUCHING: Penyampau orang diau ngampar di Sarawak bisi nurun iya nya sepenyampau 51 peratus dalam taun 2022 enti dibandingka enggau dalam taun 2021 ti bisi 174 iku.
Menteri Pemansang Orang Indu, Nembiak Mit enggau Pengelantang Pendiau Raban Bansa, Dato Sri Fatimah Abdullah madah, bepelasarka statistik enggau kar orang diau ngampar di Sarawak dalam taun 2022, bisi 89 iku orang diau ngampar mendam ti mujur dikelala enggau diprofilka.
Ari penyampau nya, bisi 71 peratus iya nya lelaki lalu laluh nya 29 peratus iku indu, ku iya.
“Entara kebuah besai sida tu nyadi orang diau ngampar iya nya nadai endur diau (24 peratus), nadai kereja (22 peratus), pengerai runding (13 peratus), penanggul ruang bilik (tujuh peratus), gian dadah enggau substan (10 peratus) enggau kebuah bukai baka kala dijil, nadai agi diri sebilik.
“Enti nitihka Adminstrasyen Bagi Menua di Sarawak, bisi 42 iku iya nya di Kuching, 25 iku (Sibu), tujuh iku (Bintulu), lapan iku (Miri), tiga iku (Sarikei) enggau tiga di Samarahan.
“Enti dibandingka, statistik orang diau ngampar dalam taun 2022 ngayanka penurun sepenyampau 51 peratus dibandingka enggau ba taun 2021 (bisi 174 iku),” ku iya, kemari.
Fatimah ngenang pekara nya ba aum pengarang berita pengudah tembu aum Komiti Mutarka Orang Diau Ngampar Sarawak (JPGS) ke diatur ba Bilik Aum Besai, Wisma Bapa Malaysia, ditu.
Nitihku iya, dalam timpuh tiga taun, sekumbang menua betapi enggau pandemik COVID-19, penyampau orang diau ngampar di Sarawak bisi nambah ngagai tiga angka iya nya 114 iku ba taun 2019, 237 iku (2020) enggau 174 iku (2021) lalu penyampau nya nurun ngagai 89 iku ba taun 2022.
Berebak enggau tu mega, iya madahka bisi tiga siri operasyen nyelamat orang diau ngampar sechara begulai lalu 69 operasyen bepelasarka input komuniti udah dipejalaika sepemanjai taun 2022.
Ngenang langgur program enggau intervensyen sosial JPGS taun 2023, iya madah kelimpah ari deka nembuka tiga TTG nya, sida deka ngatur empat siri sama enggau ngatur kena ngemansangka Garis Lalu Ngadu enggau Operasyen TTG Sibu (meresa baru garis lalau), Bintulu, Miri enggau Kuching.
Nambah nya, meri latih kompetensi ngagai pengereja pengawa ba TTG Sibu kena napi isu orang ti diau ngampar ke bisi penanggul ba pengerai runding sereta ngemayuhka projek 'social enterprise' ti setipak ba TTG Sibu.
Kelimpah ari nya, ngemansangka agi 'Sistem Profil Gelandangan' di Sarawak ngena kereban 'Pengurusan Bersepadu Kes Isu Sosial' ke udah disetuju dalam Aum Kaban Kaunsil Pemansang Sosial (MPS) kena 30 Januari 2023, enggau ke bukai.
Nyempulang Fatimah maya aum pengarang berita nya kemari, Sapit Menteri iya, Mohamad Razi Sitam; Sekretari Mendam Opis Menteri iya, Noriah Ahmad enggau Sekretari Eksekutif MPS Sarawak Dr. Zufar Yadi Brendan Abdullah.