SRI AMAN: Pengerami Chap Goh Mei Renggat Bagi Menua Sri Aman ti diatur Serakup Soon Heng Simanggang ti diintu bansa China kena hari ke-15 Taun Baru China ditu, siti budaya ti unik sereta ulih matak penatai mensia mayuh.
Sapit Menteri Pelajar, Inovasyen enggau Pemansang Pengelandik Datuk Francis Harden Hollis madahka pengawa bejalai bebala mayuh ti diatur ninting taun ditu, ulih matak penatai beribu iku ke pasar Sri Aman.
"Ba mensia mayuh di Sri Aman, pengawa bejalai bebala mayuh Chap Goh Mei tu siti budaya ti nyelai amat laban tebal agi ke enggau nya ukai semina raban bansa China tang mega bisi bansa Bumiputera.
"Tu mih kelai penyerakup laban semua bansa bisi peluang enggau ngerami pengawa bejalai bebala mayuh enda ngira bansa Iban, Melayu enggau ke bukai laban kitai idup dalam perugan rayat Malaysia," ku iya.
Kaban Kunsil Negeri Simanggang bejaku munyi nya lebuh ke dirandau maya enggau pengawa bejalai bebala mayuh Pengerami Chap Goh Mei 2023 ba Tepikung Ciyun ditu, malam ensana.
Ku iya, pengawa bejalai bebala mayuh Chap Goh Mei tau nyadi siti produk dagang temuai di Sri Aman laban nya nyelai sereta jarang dipeda sebedau tu.
"Pasar Sri Aman endang udah tebilang enggau pengerichah Pesta Bena ti diatur nnting taun lalu semua mensia mayuh di dunia ngelala bena di pasar tu ke pemadu nyelai.
"Nya alai, pengawa bejalai bebala mayuh Chap Goh Mei mega tau nyadi siti agi pematak temuai ngagai pasar Sri Aman," ku iya.
Ku Harden, kerejasama semua beguna amat dikena ngelakuka pengawa bejalai bebala mayuh tu ngagai orang di luar ambika mayuh agi orang datai kitu taun baru ila.
"Siti ari chara iya nya media amat diguna kena meri pamadah ngagai orang diluar din bekaul enggau perogram bejalai bebala mayuh tu nyengkaum ngelakuka nya nengah televisyen,surat berita menua, Internet,Opis Menteri Dagang Temuai enggau ke bukai.
"Pengawa ngelaku ti dipejalaika ungkup Pesta Bena Sri Aman chukup ngemegahka ati laban ninting taun pengerami nya diatur, orang ke datai ke Sri Aman ukai semina domestik tang mega ari menua luar," ku iya.
Ku Harden, enti pengawa bejalai bebala mayuh Chap Goh Mei dikelakuka enggau chara ke besai, nya mega baka Pesta Bena ti ulih matak penatai beribu iku orang ke Sri Aman.
Sama bisi maya nya, Kaban Parlimen Sri Aman Datuk Seri Doris Sophia Brodie, Kaban Kunsil Negeri Lingga Dayang Noorazah Awang Sohor enggau bala ketuai enggau tuai rumah.
Lebih 63 kerita berias bisi enggaumaya pengawa bejalai bebala mayuh nya nyengkaum ari mayuh bengkah ejensi perintah enggau gerempung di bagi menua Sri Aman.