Agi dalam pansik berindik ari gaji pengereja pengawa opis perintah enda engkeman enggau administrasyen di Sarawak
"Nya alai, baka ti dipadah sebedau tu, kami dalam perintah ngiga chara deka ngembuan skim gaji kitai (Sarawak) ke diri empu ti enda bekait enggau ordinan pinchin ungkup pengereja pengawa opis perintah,"
Datuk Patinggi Tan Sri Abang Johari Tun Openg
Premier Sarawak
KUCHING: Perintah Sarawak diatu benung bejalaika pengawa mansik dikena ngiga chara numbuhka skim gaji ungkup pengereja pengawa opis perintah negeri, ku Premier Sarawak, Datuk Patinggi Tan Sri Abang Johari Tun Openg.
Nitihku iya, tu laban gaji ti diterima pengereja pengawa opis perintah diatu udah enda relevan enggau enda setipak enggau pengawa ngatur tauka administrasyen di Sarawak.
"Kitai dalam perintah meda upah ti diterima pengereja pengawa opis perintah diatu laban gaji sida kekadang enda setipak.
"Nya alai, baka ti dipadah sebedau tu, kami dalam perintah ngiga chara deka ngembuan skim gaji kitai (Sarawak) ke diri empu ti enda bekait enggau ordinan pinchin ungkup pengereja pengawa opis perintah," ku iya.
Iya madahka pekara nya maya bejadi Pengerami Serumpu Makai Lemai Opis Tanah enggau Survei JTS Summit 2023 ba Pusat Konvensyen Borneo Kuching (BCCK), ditu Hari Lima (Jumaat).
Menteri Wang enggau Ekonomi Baru nya madahka, amat beguna bisi skim gaji ke diri empu ngambika penatai pemisi pengereja pengawa opis perintah setipak enggau pengurusan di Sarawak.
"Perintah berundingka chara bakani deka 'nyarakka' ari skim pincin tu, awakka kitai bisi skim gaji kitai empu ungkup pengereja pengawa ois perintah," ku iya.
Taja pia, iya enda besemayaka pekara nya laban agi dalam pansik.
"Aku enda besemaya laban agi dalam pansik. Kitai besampi aja awakka kami dalam perintah ulih berunding enggau bejalaika pekara bakani deka 'nyarakka' (nyerara) ari skim pinchin ke udah bisi enggau skim gaji diri empu," ku iya.
Ba pengerami ti sama, Abang Johari madahka penyulut asil negeri Sarawak ngayanka penambah ba taun nyin kemari iya nya sepenyampau enyau deka manggai RM12 bilion.
Nengah penatai pemisi asil nya, iya arap bendar deka lebih mayuh anak Sarawak ti gawa di luar Sarawak pulai ke negeri tu.
"Aku bisi pengarap iya nya anak Sarawak ke gawa di luar menua ke bisi penemu teknologi, sida deka pulai kitu sereta bisi sekda udah pulai (ke Sarawak).
"Tu laban, ditu (Sarawak), kitai ulih nyendika sida gaji ti lebeih meruan bepelasarka penemu dalam bidang teknologi ke dipelajar sida," ku iya, seraya madah, chara tu lalu setipak enggau pelin Stratagei Pemansang Pengudah COVID-19 (PCDS) 2030.
Ku iya, nengah PCDS 2030 nya, Sarawak patut nyungkakka Keluaran Dalam Negara Kasar (KDNK) ngagai RM232 bilion sereta pengeran kitai ba tu patut dipejalaika enggau kerejasama semua orang.
"Aku pechaya enggau pengereja pengawa ke dikembuan kitai diatu enggau rebak baru, aku ngarapka sida chukup pintar enggau kitai ulih nyapai aspirasi 2030," ku iya.
Bekaul enggau pekara ti sama, Abang Johari madahka ungkup belanja RM5 juta ungkup JTS numbuhka kursi pengawa pemansik ti meri fokus ngagai ubah gaya hari enggau teknologi gadung.
Pekara nya, ku iya, deka dipejalaika enggau kerejasama Universiti Teknologi Malaysia (UTM).
Sama bisi datai, Sapit Premier Sarawak, Dato Sri Sim Kui Hian enggau Datuk Amar Awang Tengah Ali Hasan, Sapit Menteri Perambu Mengeri, Administrasyen Tanah enggau Rampa Menua, Datu Len Talif Salleh, enggau Direkor JTS , Datu Abdullah Julaihi sereta tembuai bukai.