LIMBANG: “Kasihka mih rayat ti berambun nyawa nengah jalai tanah tusur lebih sebulan ke udah, anang nganti bisi bebadi nyawa."
Pia ku jaku sebana peranak rumah panjai ti enggai enda pan nengah jalai ti jai sereta tusur di Bawang Obor ketegal enda dikemanahka sebulan ke udah.
Peranak dia madah, udah suah leka sebana dikenataika ngagai opis enggau ejensi ke bekaul beberapa bulan ke udah berindik ari gaya jalai ke semak enggau Kampung Tanah Merah ti balat jai sereta tusur.
Ku sida, jalai nya balat jai ketegal hari ujanbeberapa hari ke udah ti ngujungka tusur ba setengah ari jalai ti ngujungka nya enda ulih ditengah.
Ku sida, ketegal jalai nya enda dikemanahka, sebuah pikap udah bebadi ba endur nya tang nadai nabanka nyawa.
Peranak Rumah John Kelati, Jangan Bakar madah, kunteriktor ti dikearapka ngemanahka jalai nya patut jampat agi ngemanahka jalai nya enggau lengkas.
"Udah mayuh jaku sebana dikenataika ngagai raban nya enggau kunteriktor ti dikearapka ngemanahka jalai ti patut manah agi bejalaika tanggungpengawa.
"Enti enda diseruri, kami irauka pekara ti enda manah nyadi, kasihha mih rayat ti nengah jalai nya ninting hari," ku iya lebuh dirandau media ditu, kemari.
Jangan madah, ketegal jalai nya jai sebuah pikap ke ngundan semin dalam pejalai ke Ulu Tubai kena penusah bebadi dia.
"Pendingka mih sebana rayat, tuai rumah udah puas besadu pasal penanggul tu, tang nyentuk ke diatu lalu nadai ninga jaku timbal.
"Kami enggaika insiden tu (jalai) nyadi modal politik taja pan nya nyadi tanggungpengawa ejensi perintah ke bekaul enggau kunteriktor ti patut ngemanahka nya ,” ku iya.
Berebak enggau nya, Residen Limbang Yunus Tambi lebuh ke dirandau Utusan Borneo kemari madah, iya udah minta Opis Kereja Raya (JKR) enggau Komiti Penusah Ngenyit mutarka penanggul tanah tusur nya enggau lengkas.
Jalai Bawang Obor ti jai nya nyadi jalai penyambung ngagai beberapa buah rumah panjai enggau genturung pendiau nyengkaum Rumah John Kelati, Lubuk Pasu, Kampung Long Sepangah, Kampung Ulu Tubai enggau Kampung Tanah Merah, kelimpah ari nyadi batang jalai ke Gunung Buda enggau Gunung Mulu, Miri.