Iya deka berandau enggau ejensi,opis ke bekaul deka diatur abis laun Hari Satu bekaul isu ungkus pengidup enggau rega barang
“Asai aku,ungkus pengidup patut dikemeratka baka rega barang ti ngenusah sereta nekan pengidup rayat”
Datuk Seri Anwar Ibrahim
Menteri Besai
PUTRAJAYA: Datuk Seri Anwar Ibrahim, ti berengkah bejalaika pengawa nyadi Menteri kemari, nyemetak madahkan isu ungkus pengidup deka dikemeratka perintah penyerakup ke ari baruh pegai iya kena ngurangka tating pengidup ti ditapi rayat diatu.
Ku, randau enggau ejensi sereta opis ke bekaul deka diatur abis laun Hari Satu tu berandauka isu ungkus pengidup nyengkaum rega barang.
“Taja pan (tanda) positif bisi mandangka pengering ba ringgit lalu bursa saham mega bisi mandangka pengarap ati ngagai perintah ke diatu.
“Asai aku,ungkus pengidup patut dikemeratka baka rega barang ti ngenusah sereta nekan pengidup rayat,” ku iya madah maya aum media ti keterubah iya kemari, di Perdana Putra ditu.
Anwar kemari betemu enggau pemesai tetinggi perintah baka Ketuai Sekretari Menua Tan Sri Mohd Zuki Ali enggau Ketuai Direktor Opis Pengereja Pengawa Perintah,Datuk Seri Mohd Shafiq Abdullah.
Iya ke bebaju Melayu sereta besamping mega nerima dokumen rasmi atur kereja perintah ari Mohd Zuki.
Anwar mega madahka diri arapa amat ati bala pemesai tinggi perintah ulih mantu kperintah ke ari baruh pegai iya mutarka ungkus pengidup ti nyadi di menua diatu.
“Aku nemu Hari Satu tu kemisi hari besai, enti sida (pemesai ejensi enggau opis) enda ulih, aku tau nangguhka nya dulu.
“… tang aku pechaya, komitmen bala pemesai tu, sida nemu batang pengawa kitai iya nya ngelempungka tating rayat ba renggat baruh,” ku iya.
Iya mega madahka Kabinet ti deka ditumbuhka ila deka nyaguka baru pemanah nama Malaysia ba renggat antarabansa.
Anwar, 75, ngangkat sumpah nyadi menteri ke-10 ba mua Yang di-Pertuan Agong Al-Sultan Abdullah Ri'ayatuddin Al-Mustafa Billah Shah di Istana Negara, kemari.
Ba aum media keterubah iya nyadi menteri Besai, Anwar nyemetak madahka perintah penyerakup ti deka ditumbuhka, deka mai sekeda parti kena nentuka penegap menua enggau konomi sereta nitihka semengat Konstitusyen Perintah Besai. -- BERNAMA