LAWAS: Parti Sarawak Bersatu (PSB) ngaga pemutus nyukung barang bagi gempung ti numbuhka perintah besai pengudah Pengawa Bepilih Ke-15 (PRU15) tu.
Sekretari Besai PSB Baru Bian (gambar) madah, pemutus nya digaga kena ngenegapka politik negara lalu pari mega ulih fokus mulaika pemanah ekonomi sereta nyendiakapengawa puang ngagai rayat.
“Kami enggau nyadi penyakal belama iya, nya alai kami udah ngaga pemutus nyukung sesapa ti nyadi perintah di Putrajaya sereta begulai enggau sida.
“Nengah chara nya,aku pechaya penyukung kami deka sama enggau nyukung pemutus tu ke pemaik menua,” ku iya madah ngagai Utusan Borneo pengudah ngabas palan paip gis Sabah-Sarawak (SSGP) ti angus di Berikau, Jalai Ba’kelalan, ditu kemari.
Ku Baru, taja pia tu tepulai ngagai gempung ti numbuhka perintah ila sekalika deka nerima sukung pengari rayat PSB.
“Tang ba aku kami mesti diterima laban tuju kami ke sekali tu endang deka ngenegapka politik, tambah mega Duli Yang Maha Mulia (Yang di-Pertuan Agong Al-Sultan Abdullah Ri'ayatuddin Al-Mustafa Billah Shah) pan udah madah munyi nya (nempa landskap politik stabil).
“Kitai sama nganti sereta meda sapa ti numbuhka perintah di Putrajaya ila,” ku iya.
Berebak enggau nya,tinggal sehari aja timpuh bekimpin, Baru ke mega chalun PSB Parlimen Lawas madah, sekumbang dalam timpuh bekimpin nya, iya nerima timbal ti positif amat ari peranak ditu.
“Timbal ke diterima positif amat lalu tu siti peluang aku madahka diri nyadi chalun di Lawas laban tu mih keterubah endar aku minta diri nyadi chalun Parlimen Lawas.
“Tinggal sehari aja agi timpuh bekimpin, aku gaga ati laban ulih ngelawa mayuh endur di Lawas sereta betemu enggau peranak ditu seraya mendingka sekeda isu ti dibantaika sida.
“Aku deka madah ditu, nyema aku dipilih nyadi pengari rayat Parlimen Lawas, aku enda besiping ba pengawa ngagihka bajet,ungkup belanja enggau bantu nggai peranak ti begunaka nya,” ku iya.
Ngena peluang nya mega, Baru mejah penerang ti dipansut Kaban Kunsil Negeri Tamin, Christopher Gira bedau lama udah ti madahka Baru enda bejalaika pengawa nyadi Kaban Parlimen Selangau enggau Menteri Kereja Raya enggau manah, lalu nya siti pemula ngagai peranak di Lawas.
“YB Tamin tu bulaka orang di Lawas tu, iya tau nyebut sebarang utai tang peranak di Lawas ditu nemu sereta arapka pengawa ti udah dikereja aku pengelama 22 bulan (nyadi Menteri Kereja Raya).
“Rikod aku nyata amat ulih mai mai agih belanja ke Selangau lalu aku mega bisi mai isu sekula repuk, klinik repuk enggauperengkaguna baka bungkur Internet ti enda meruan di Selangau.
“Kelimpah ari nya, aku mega beratka Lawas sereta mai sekeda projek besai baka Sabah-Sarawak Link Road, tinda baru sepital enggau ngemanahka sekula,” ku iya.